रत्नागिरी : रत्नागिरीतील युवा वैद्यकीय क्षेत्रातील उदयोन्मुख व्यक्तिमत्त्व डॉ. पूर्वप्रभा पाटील यांनी न्यूयॉर्क येथे आयोजित संयुक्त राष्ट्रांच्या प्रतिष्ठित युवा मंचात भारताचे प्रतिनिधित्व करत कोकणच्या शिरपेचात मानाचा तुरा खोवला आहे. त्या रत्नागिरीतील प्रख्यात नेत्रतज्ज्ञ डॉ. राधाराणी पाटील यांच्या कन्या असून, २०२४ च्या विधानसभा निवडणुकीत रत्नागिरी मतदारसंघातून अपक्ष उमेदवार म्हणून निवडणूक लढवलेले ज्योतीप्रभा पाटील यांच्या धाकट्या भगिनी आहेत. वैद्यकीय शिक्षण आणि जागतिक आरोग्य क्षेत्रात त्यांनी उल्लेखनीय कामगिरी करत मेडिकल स्टुडंट्स असोसिएशन ऑफ इंडिया या संघटनेच्या राष्ट्रीय अध्यक्षा म्हणून जबाबदारी सांभाळली होती. या पदावर कार्यरत असताना त्यांनी देशभरातील २० हजारांहून अधिक वैद्यकीय विद्यार्थ्यांचे प्रतिनिधित्व केले. तसेच जागतिक आरोग्य संघटना अर्थात जागतिक आरोग्य संघटना संबंधित विविध व्यासपीठांवर सहभाग घेत जागतिक आरोग्य विषयांवर भारताची भूमिका प्रभावीपणे मांडली आहे.
नुकतेच संयुक्त राष्ट्र आर्थिक आणि सामाजिक परिषद आयोजित ECOSOC युवा मंच २०२६ मध्ये त्यांनी भारताचे प्रतिनिधित्व केले. १४ ते १६ एप्रिलदरम्यान संयुक्त राष्ट्रांचे मुख्यालय येथे पार पडलेल्या या जागतिक परिषदेत विविध देशांतील धोरणकर्ते, संयुक्त राष्ट्रांचे अधिकारी आणि युवा नेते सहभागी झाले होते. ‘मुलं आणि युवा प्रमुख गट’ प्रतिनिधी म्हणून सहभागी झालेल्या डॉ. पूर्वप्रभा पाटील यांनी शाश्वत विकास आणि सार्वजनिक आरोग्याशी संबंधित विषयांवर आपले विचार मांडले. विशेषतः ‘डिजिटल हेल्थकेअर’ या विषयावर त्यांनी तंत्रज्ञानाच्या माध्यमातून आरोग्यसेवा अधिक सुलभ, परवडणारी आणि परिणामकारक कशी बनवता येईल यावर भर दिला. भारतासारख्या विकसनशील देशांमध्ये डिजिटल आरोग्यसेवेची क्षमता मोठी असल्याचे त्यांनी स्पष्ट केले. त्यांच्या या उल्लेखनीय सहभागामुळे रत्नागिरी आणि संपूर्ण कोकणवासीयांमध्ये अभिमानाचे वातावरण निर्माण झाले असून, जागतिक स्तरावर भारतीय युवा नेतृत्वाचा प्रभाव अधिक ठळकपणे समोर आला आहे.
