ठाणे : संजय गांधी राष्ट्रीय उद्यान अंतर्गत येणाऱ्या येऊर, तुंगारेश्वर उत्तर आणि दक्षिण विभागासह तानसा वन्यजीव अभयारण्य येथे वन विभागाकडून विशेष वन्यजीव गणना मोहीम राबविण्यात आली. या प्राणी गणनेदरम्यान विविध पाणवठे आणि जंगल परिसरात एकूण ९० हून अधिक वन्यजीव, पक्षी आणि सरपटणाऱ्या प्राण्यांची नोंद करण्यात आली. विशेष म्हणजे, यंदाच्या गणनेत बिबट्याचे दर्शन झाल्याने वन अधिकाऱ्यांमध्ये समाधान व्यक्त करण्यात आले. गेल्या वर्षी ढगाळ वातावरणामुळे बिबट्या दिसला नव्हता. मात्र यंदा हवामान अनुकूल असल्याने विविध प्राण्यांच्या हालचाली स्पष्टपणे टिपता आल्या.
येऊर आणि तुंगारेश्वर परिसरात बिबट्या, चितळ, भेकर, सांबर, रानडुक्कर, मुंगूस, हनुमान लंगूर आणि इतर प्राण्यांची मिळून ३४ नोंदी करण्यात आल्या. ही मोहीम उपवनसंरक्षक राहुल गवई आणि सहाय्यक वनसंरक्षक दत्तात्रय मिसाळ यांच्या मार्गदर्शनाखाली पार पडली. वन विभागाने साखरोली, केळीचे पाणी, बोरद्याचे पाणी, आघई पाझर तलाव आणि वेडवहाळ वनमोरी नाला या प्रमुख पाणवठ्यांवर मचाण उभारून रात्रभर निरीक्षण केले. या वेळी माकड, वानर, चौसिंगा, साळिंदर, ससा, जंगली मांजर, उदमांजर, उडणारी खार यांसारख्या प्राण्यांचे आवाज ऐकू आले, तर काही प्राणी प्रत्यक्ष नजरेसही पडले. याशिवाय धामण, घोणस यांसारखे सर्प तसेच पाल, सरडे आणि बेडूक यांसारख्या सरपटणाऱ्या प्रजातींचीही नोंद घेण्यात आली. पक्षीनिरीक्षणादरम्यान चट्टेरी वन घुबड, टिपकेवाला पिंगळा, गव्हाणी घुबड, मोर, सर्पगरुड, घार, सुतारपक्षी, सातभाई, सह्याद्रीचा सूर्यपक्षी, निळा सूर्यपक्षी यांसारख्या विविध पक्ष्यांचे अस्तित्व आढळून आले. अधिकाऱ्यांच्या माहितीनुसार, येऊर आणि तुंगारेश्वर विभागात एक बिबट्या, तीन चितळ, तीन भेकर, दोन सांबर, चार रानडुक्कर, सात हनुमान लंगूर, तीन मुंगूस, चार वटवाघुळे आणि इतर प्राण्यांसह एकूण ३४ वन्यजीवांची नोंद झाली. तर तानसा अभयारण्यात १४ सस्तन प्राणी, सहा सरपटणारे प्राणी आणि तब्बल ४१ पक्षी प्रजातींची नोंद करण्यात आली असून, या भागातील जैवविविधता समृद्ध असल्याचे पुन्हा अधोरेखित झाले आहे.
