मुंबई : मुंबईतील अनधिकृत पथविक्री आणि फेरीवाल्यांमुळे निर्माण होणाऱ्या समस्यांबाबत नागरिकांना तक्रारी नोंदविणे अधिक सोपे व्हावे यासाठी मुंबई महानगरपालिका प्रशासनाने ‘व्हॉट्सॲप चॅटबॉट’ सुविधा उपलब्ध करून दिली आहे. या सुविधेअंतर्गत नागरिकांना ८९९९-२२-८९९९ या क्रमांकावर अनधिकृत फेरीवाल्यांविरोधात थेट तक्रारी नोंदविता येणार आहेत. महानगरपालिका आयुक्त अश्विनी भिडे यांच्या आदेशानुसार आणि अतिरिक्त महानगरपालिका आयुक्त डॉ. विपिन शर्मा यांच्या मार्गदर्शनाखाली नागरी समस्यांबाबत तक्रारी, सूचना आणि अभिप्राय नोंदविण्यासाठी माहिती तंत्रज्ञानाचा अधिक प्रभावी वापर करण्यात येत आहे. त्याचाच एक भाग म्हणून अनधिकृत पथविक्रीसंदर्भातील तक्रारींसाठी ही विशेष सुविधा सुरू करण्यात आली आहे. यापूर्वी रस्ते, खड्डे, स्वच्छता, पाणीपुरवठा आणि इतर नागरी सुविधांबाबतच्या तक्रारी नागरिकांकडून १९१६ हेल्पलाईन, समाजमाध्यमे आणि इतर माध्यमांतून प्राप्त होत होत्या. तसेच नागरिकांच्या सोयीसाठी महापालिकेने ८९९९-२२-८९९९ या क्रमांकावर ‘व्हॉट्सॲप चॅटबॉट’ सेवा सुरू केली होती. मात्र, विविध प्रकारच्या तक्रारींसाठी वेगवेगळ्या प्रणालींचा वापर करावा लागत असल्याने नागरिकांना काही अडचणींचा सामना करावा लागत होता. ही बाब लक्षात घेऊन महापालिकेने यंदा ‘मायबीएमसी मार्ग’ ही एकात्मिक तक्रार व्यवस्थापन प्रणाली विकसित केली आहे. या प्रणालीमुळे विविध विभागांशी संबंधित तक्रारी एकाच माध्यमातून नोंदविण्याची सुविधा उपलब्ध झाली आहे.
अनधिकृत पथविक्रीविरोधातील तक्रारींसाठी स्वतंत्र पर्याय उपलब्ध करून देण्याबाबत उच्च न्यायालयाने महापालिकेला निर्देश दिले होते. या निर्देशांचे पालन करत महानगरपालिकेने ‘व्हॉट्सॲप चॅटबॉट’ सेवेमध्ये अनधिकृत फेरीवाल्यांविषयी तक्रार नोंदविण्यासाठी स्वतंत्र सुविधा समाविष्ट केली आहे. नागरिकांना आता मोबाईलवरून काही सोप्या टप्प्यांमध्ये तक्रार नोंदविता येणार आहे. त्यासाठी सर्वप्रथम ८९९९-२२-८९९९ या क्रमांकावर व्हॉट्सॲप संदेश पाठवून ‘नमस्कार’, त्यानंतर ‘मराठी’, ‘नागरिक’, ‘नागरी सेवा’, ‘तक्रार निवारण’, ‘तक्रार सबमिट करा’, ‘तक्रार प्रकार’, ‘फेरीवाले’, ‘बेकायदेशीर फेरीवाल्यांचा उपद्रव’, ‘ठिकाण’ आणि शेवटी संबंधित ठिकाणाचे ‘थेट छायाचित्र’ अपलोड करावे लागेल. या प्रक्रियेद्वारे तक्रार तत्काळ संबंधित विभागाकडे पाठविली जाईल. नागरिकांचा सहभाग वाढवून सार्वजनिक रस्ते, पदपथ आणि इतर सार्वजनिक जागांवरील अनधिकृत पथविक्रीला आळा घालण्याच्या उद्देशाने ही सुविधा सुरू करण्यात आली असून त्यामुळे तक्रार नोंदविण्याची प्रक्रिया अधिक जलद, पारदर्शक आणि प्रभावी होणार असल्याचा विश्वास महापालिका प्रशासनाने व्यक्त केला आहे.
