ठाणे : परराज्यातून औषधांच्या बनावट चलनांच्या (इनव्हॉइस) आधारे विदेशी मद्याची तस्करी करण्यात येत असल्याचा धक्कादायक प्रकार ठाण्यात उघडकीस आला आहे. राज्य उत्पादन शुल्क विभागाच्या भरारी पथकाने मुंबई-नाशिक महामार्गावर कारवाई करत तब्बल १ कोटी ६६ लाख रुपयांचा मुद्देमाल जप्त केला असून दोन आरोपींना अटक करण्यात आली आहे. पर्गत सिंग कर्तार सिंग आणि अमरीतबिर सिंग हरप्रीत सिंग अशी अटक करण्यात आलेल्या आरोपींची नावे आहेत. राज्य उत्पादन शुल्क विभागाला मिळालेल्या गुप्त माहितीच्या आधारे ही कारवाई करण्यात आली. गोवा राज्यात निर्मित विदेशी मद्य औषधांच्या नावाखाली बनावट कागदपत्रांच्या सहाय्याने राज्यात आणले जात असल्याची माहिती अधिकाऱ्यांना मिळाली होती. त्यानुसार ५ मे रोजी खारेगाव टोलनाका ते माजिवाडा रोड परिसरात विशेष सापळा रचण्यात आला. सायंकाळी सुमारे ६.३० वाजण्याच्या सुमारास एमपी ०९ जीजी ७९३० क्रमांकाचा पांढऱ्या रंगाचा कंटेनर संशयाच्या आधारे थांबवून त्याची तपासणी करण्यात आली.
तपासणीदरम्यान कंटेनरमध्ये पुढील बाजूस ठेवण्यात आलेले बॉक्स उघडून पाहिले असता त्यामध्ये मोठ्या प्रमाणात ‘रॉयल ब्लू माल्ट व्हिस्की’च्या १८० मिलीच्या बाटल्या आढळून आल्या. पथकाने एकूण १४५० बॉक्समध्ये साठवलेले सुमारे १२,५२८ लिटर विदेशी मद्य जप्त केले. संबंधित कंटेनरसह एकूण १,६६,११,५०० रुपयांचा मुद्देमाल हस्तगत करण्यात आला आहे. या प्रकरणी राज्य उत्पादन शुल्क विभागाने गुन्हा नोंदवत दोन्ही आरोपींना अटक केली असून या तस्करीमागे मोठे रॅकेट कार्यरत असल्याची शक्यता तपासली जात आहे. ही कारवाई राज्य उत्पादन शुल्क विभागाचे अधीक्षक (ठाणे-१) प्रवीण तांबे, प्रभारी उपअधीक्षक आनंद पवार आणि उपअधीक्षक रत्नमाला गायकवाड यांच्या मार्गदर्शनाखाली करण्यात आली. निरीक्षक एम. पी. धनखेडे, दुय्यम निरीक्षक एन. आर. महाले, एस. आर. मिसाळ, सहाय्यक दुय्यम निरीक्षक व्ही. जी. थोरात तसेच इतर अधिकारी व कर्मचाऱ्यांनी या मोहिमेत सहभाग घेतला. या कारवाईमुळे औषधांच्या नावाखाली सुरू असलेल्या बेकायदा मद्य वाहतुकीचे जाळे उघड होण्याची शक्यता व्यक्त करण्यात येत आहे.
