मुंबई : मुख्य निवडणूक आयुक्त ज्ञानेश कुमार यांच्याविरोधात ‘एसआयआर’ (Special Intensive Revision) प्रक्रियेवरून राजकीय वाद अधिक तीव्र होत असून, विरोधी पक्षांकडून त्यांच्या राजीनाम्याची मागणी करण्यात येत आहे. या पार्श्वभूमीवर कॉकरोच जनता पार्टीचे (CJP) प्रमुख अभिजीत दीपके यांनीही आक्रमक भूमिका घेत मुख्य निवडणूक आयुक्तांना थेट आव्हान दिले आहे. सामाजिक माध्यम ‘एक्स’वरील पोस्टद्वारे त्यांनी, ज्ञानेश कुमार यांनी तातडीने राजीनामा न दिल्यास २ ऑक्टोबर रोजी महात्मा गांधी जयंतीच्या निमित्ताने मुंबईसह देशातील प्रमुख शहरांमध्ये ‘लोकशाही वाचवा’ या घोषवाक्याखाली देशव्यापी आंदोलन छेडण्यात येईल, असा इशारा दिला आहे. एसआयआर प्रक्रियेच्या नावाखाली मतदार यादीबाबत गंभीर अनियमितता झाल्याचा आरोप करत या प्रकरणाची सखोल चौकशी करण्याची मागणीही त्यांनी केली आहे.
अभिजीत दीपके, सौरव दास आणि आशुतोष रांका यांनी संयुक्त पत्रकार परिषद घेऊन निवडणूक आयोगाला ४८ तासांचा अल्टिमेटम दिला. त्यांनी तीन प्रमुख मागण्या मांडल्या असून, त्यामध्ये मुख्य निवडणूक आयुक्त ज्ञानेश कुमार यांनी तात्काळ राजीनामा द्यावा आणि त्यांच्याविरोधात फौजदारी गुन्हा दाखल करावा, एसआयआर प्रक्रिया रद्द करून जानेवारी २०२५ ची मतदार यादी पुन्हा लागू करावी तसेच २०२३ चा निवडणूक आयोगाशी संबंधित कायदा रद्द करून आयोगाच्या रचनेत व्यापक सुधारणा कराव्यात, या मागण्यांचा समावेश आहे. दरम्यान, या आंदोलनाच्या घोषणेमुळे राजकीय वातावरण आणखी तापण्याची चिन्हे दिसत आहेत. मात्र, या आरोपांवर निवडणूक आयोगाची अधिकृत भूमिका समोर आलेली नसून, प्रकरणाकडे देशभरातील राजकीय पक्ष आणि नागरिकांचे लक्ष लागले आहे.
