पालघर : आर्थिक फसवणुकीसाठी गुन्हेगारांकडून दिवसेंदिवस नवनवीन क्लृप्त्या वापरल्या जात असून, बोईसरमध्ये अशाच एका धक्कादायक प्रकाराचा पर्दाफाश झाला आहे. एटीएममध्ये वॉकीटॉकीचा वापर करून मदतीचे नाटक करत एका महिलेची तब्बल ९० हजार रुपयांची फसवणूक करण्यात आली. या प्रकरणात एटीएम कार्ड आणि गुप्त पिन क्रमांक मिळवून रक्कम काढणाऱ्या आरोपीला बोईसर पोलिसांनी तांत्रिक तपास आणि गुप्त माहितीच्या आधारे अटक केली आहे. पोलिसांनी दिलेल्या माहितीनुसार, १४ सप्टेंबर रोजी सकाळी साडेअकराच्या सुमारास पालघर येथील समीरा मुशर्रफ खान (वय ३७) या सालवड शिवाजीनगर येथील स्टेट बँक ऑफ इंडियाच्या एटीएम केंद्रात पैसे काढण्यासाठी गेल्या होत्या. त्यांनी सुरुवातीला सात हजार रुपये काढल्यानंतर पुन्हा व्यवहार करण्याचा प्रयत्न केला असता त्यांचे एटीएम कार्ड मशीनमध्ये अडकले. त्याच वेळी एटीएम कक्षात लपवून ठेवलेल्या वॉकीटॉकीद्वारे एका व्यक्तीने कॅमेऱ्यातून सर्व पाहत असल्याचा भास निर्माण करून त्यांना मदत करण्याचे नाटक केले. आरोपीने तीन वेळा पिन क्रमांक टाकून ‘कॅन्सल’ आणि ‘एंटर’ बटण दाबण्याच्या सूचना दिल्या. त्यानंतर मोबाईल क्रमांक लिहून ठेवण्यास सांगत एटीएम दुरुस्ती करणारा कर्मचारी आल्यावर कार्ड परत मिळेल, असे सांगून महिलेला घरी जाण्यास सांगितले. महिला निघून गेल्यानंतर आरोपीने मशीनमधून कार्ड काढून त्यांच्या खात्यातून तब्बल ९० हजार रुपये काढून फसवणूक केली.
या घटनेनंतर महिलेच्या तक्रारीवरून बोईसर पोलीस ठाण्यात भारतीय न्याय संहिता (BNS) कलम ३०३(२) आणि ३१८(४) अंतर्गत गुन्हा दाखल करण्यात आला. पोलीस अधीक्षक यतीश देशमुख, अप्पर पोलीस अधीक्षक विनायक नरळे, उपविभागीय पोलीस अधिकारी दिनेश बैसाणे यांच्या मार्गदर्शनाखाली पोलीस निरीक्षक सुनील जाधव आणि सहाय्यक पोलीस निरीक्षक सुनील साळुंखे यांच्या नेतृत्वाखालील गुन्हे प्रकटीकरण शाखेने या प्रकरणाचा तपास सुरू केला. तांत्रिक विश्लेषण, सीसीटीव्ही फुटेज आणि गुप्त माहितीच्या आधारे पोलिसांनी १८ सप्टेंबर रोजी कळवा (ठाणे) येथून जितेंद्र रामदेव पाल याला अटक केली. आरोपीकडून फसवणुकीतील ६० हजार रुपयांची रोख रक्कम, गुन्ह्यात वापरलेले दोन वॉकीटॉकी संच तसेच वाहन जप्त करण्यात आले आहे. या घटनेनंतर पोलिसांनी नागरिकांना एटीएममध्ये कोणत्याही अनोळखी व्यक्तीच्या सूचनांवर विश्वास ठेवू नये, पिन क्रमांक कोणालाही सांगू नये आणि कार्ड अडकल्यास थेट संबंधित बँकेच्या अधिकृत हेल्पलाइनशी किंवा शाखेशी संपर्क साधावा, असे आवाहन केले आहे. या प्रकरणामुळे एटीएम फसवणुकीसाठी गुन्हेगार आता अधिक आधुनिक आणि भ्रामक पद्धती वापरत असल्याचे पुन्हा एकदा स्पष्ट झाले आहे.
