मुंबई : राज्यात ‘एसआयआर’ (Special Intensive Revision) प्रक्रियेवरून राजकीय संघर्ष अधिक तीव्र होत असून, मुख्य निवडणूक आयुक्त ज्ञानेश कुमार यांच्या कार्यपद्धतीवर गंभीर प्रश्न उपस्थित केले जात आहेत. निवडणूक आयुक्त सुखबीर सिंह संधू आणि विवेक जोशी यांनी काही निर्णयांबाबत आक्षेप नोंदवल्याचे वृत्त समोर आल्यानंतर विरोधकांनी निवडणूक आयोगावर जोरदार टीका सुरू केली आहे. महाराष्ट्र नवनिर्माण सेना आणि शिवसेना (उद्धव बाळासाहेब ठाकरे) यांनी आरोप केला आहे की, ज्ञानेश कुमार यांच्या नेतृत्वाखाली ‘एसआयआर’ प्रक्रियेच्या नावाखाली मतदारांची फसवणूक झाली असून आयोगाने निष्पक्ष संस्थेऐवजी सत्ताधारी पक्षाच्या भूमिकेत काम केल्याचा आरोप केला आहे. या पार्श्वभूमीवर दोन्ही पक्षांनी पुन्हा एकदा एकत्र येत ४ ऑक्टोबर रोजी मुंबईत भव्य जनमोर्चा काढण्याची घोषणा केली आहे. मनसे अध्यक्ष राज ठाकरे यांनी यासंदर्भात सोशल मीडियावर पोस्ट करत जनतेला मोठ्या संख्येने सहभागी होण्याचे आवाहन केले आहे. या आंदोलनाच्या माध्यमातून एसआयआर प्रक्रिया रद्द करावी, संपूर्ण प्रकरणाची निष्पक्ष चौकशी व्हावी आणि लोकशाही प्रक्रियेवरील विश्वास कायम ठेवण्यासाठी आवश्यक निर्णय घ्यावेत, अशी मागणी करण्यात येणार असल्याचे दोन्ही पक्षांनी स्पष्ट केले आहे.
मनसे प्रमुख राज ठाकरे आणि शिवसेना पक्षप्रमुख उद्धव ठाकरे यांनी संयुक्तपणे या जनमोर्चाची घोषणा करत हा केवळ दोन पक्षांचा कार्यक्रम नसून लोकशाही आणि संविधानाच्या संरक्षणासाठीचा व्यापक जनआंदोलनाचा प्रारंभ असल्याचे म्हटले आहे. राज्यातील तसेच देशातील इतर राजकीय पक्षांनाही या मोर्चात सहभागी होण्याचे आवाहन करण्यात येणार असून यासाठी सर्व स्तरांवर संपर्क सुरू असल्याचे सांगण्यात आले आहे. जनमोर्चाची वेळ आणि मार्ग लवकरच जाहीर करण्यात येणार असून मोठ्या संख्येने नागरिकांनी यात सहभागी व्हावे, असे आवाहन करण्यात आले आहे. दरम्यान, या प्रकरणाने न्यायालयाचेही दार ठोठावले असून मुख्य निवडणूक आयुक्त ज्ञानेश कुमार यांच्या विरोधात सर्वोच्च न्यायालयात याचिका दाखल करण्यात आली आहे. मतदार यादीतून कथितपणे १३ कोटी मतदारांची नावे वगळण्यात आल्याचा आरोप करत या संपूर्ण प्रकरणाची विशेष तपास पथक (SIT) मार्फत चौकशी करण्याची मागणी याचिकेत करण्यात आली आहे. त्यामुळे एसआयआर प्रक्रियेवरून सुरू झालेला वाद आता राजकीय, प्रशासकीय आणि न्यायालयीन पातळीवर पोहोचला असून आगामी काळात या प्रकरणाकडे संपूर्ण देशाचे लक्ष लागले आहे.
