नवी मुंबई : पेण तालुक्यातील हेटवणे धरणापासून प्रक्रियाविरहित व जलशुद्धिकरण केंद्रापासून प्रक्रियायुक्त (शुद्ध) पाण्यासाठी एकूण २९ किमीचे दोन स्वतंत्र बोगदे बनविण्याचे काम सिडकोद्वारा सुरू आहे. त्यापैकी ‘ऍफकॉन्स’ कंपनीद्वारा खोदण्यात आलेल्या ५.५२ किमीच्या (शाफ्ट ३ आणि ४ दरम्यान) बोगद्याल्या पहिल्या ‘ब्रेकथ्रू’ला सोमवारी सिडकोचे व्यवस्थापकीय संचालक विजय सिंघल यांच्या उपस्थितीत यश आले. सिडको आणि नैना क्षेत्रातील भविष्यातील वाढती लोकसंख्या लक्षात घेऊन सिडकोने हेटवणे जलवर्धन योजनेच्या कामाला गती दिली आहे.
अत्यंत कठीण भूगर्भीय व अभियांत्रिकी आव्हानांवर मात करत पहिल्या बोगद्याच्या ‘ब्रेक थ्रू’मुळे सिडकोने नवा इतिहास रचला आहे. कार्यक्रमस्थळी सहव्यवस्थापकीय संचालक गणेश देशमुख, मुख्य अभियंता शीला करूणाकरन, अधीक्षक अभियंता (पाणी पुरवठा) प्रवीण सेवतकर यांच्यासह सिडको आणि ‘ऍफकॉन्स’चे अधिकारी मोठ्या संख्येने उपस्थित होते. नवी मुंबई परिसरातील वाढती पाण्याची गरज भागवण्यासाठी सिडकोने हा महत्त्वाकांक्षी प्रकल्प हाती घेतला आहे. या योजनेत १३.२५ किलोमीटर लांबीचा कच्च्या पाण्याचा बोगदा आणि १५.४ किलोमीटर लांबीचा शुद्ध पाण्याचा बोगदा उभारण्यात येत आहे.
