रत्नागिरी : जिल्ह्यात अमली पदार्थांची विक्री, बेकायदेशीर साठवणूक, बाळगणे आणि सेवन करणाऱ्यांविरोधात रत्नागिरी जिल्हा पोलिसांनी ‘मिशन फिनिक्स’ अंतर्गत विशेष मोहीम अधिक तीव्र केली आहे. ८ ते १४ सप्टेंबर या कालावधीत राबविण्यात आलेल्या कारवाईत अमली पदार्थ सेवनाचे १०, तर बेकायदेशीररीत्या अमली पदार्थ बाळगल्याचे ६, असे एकूण १६ गुन्हे दाखल करण्यात आले. या कारवाईत २२ आरोपींना अटक करण्यात आली असून, ₹२ लाख २ हजार २०० किमतीचा अमली पदार्थांचा साठा जप्त करण्यात आला आहे.
पोलीस अधीक्षक नितीन दत्तात्रय बगाटे आणि अपर पोलीस अधीक्षक बी. बी. महामुनी यांच्या मार्गदर्शनाखाली जिल्ह्यातील सर्व पोलीस ठाण्यांच्या हद्दीत ही विशेष मोहीम राबविण्यात आली. अमली पदार्थांची विक्री, बेकायदेशीर साठवणूक आणि सेवन करणाऱ्यांवर पोलिसांनी विशेष लक्ष केंद्रित करून ही कारवाई केली. या मोहिमेत ₹७७ हजार किमतीचे ५.१५ ग्रॅम ब्राऊन हेरॉईन आणि ₹१ लाख २५ हजार २०० किमतीचा २.५११ किलो गांजा जप्त करण्यात आला. त्यामुळे जिल्ह्यात अमली पदार्थांच्या अवैध व्यवहारांविरोधात पोलिसांनी कठोर भूमिका घेतल्याचे स्पष्ट झाले आहे. गुन्हे दाखल करून कारवाई करण्याबरोबरच अमली पदार्थांचे सेवन आणि तस्करी रोखण्यासाठी प्रतिबंधात्मक उपाययोजना तसेच जनजागृतीवरही भर दिला जात आहे. विशेषतः तरुण पिढीला अमली पदार्थांच्या विळख्यात अडकण्यापासून रोखण्यासाठी ‘मिशन फिनिक्स’ अंतर्गत विविध जनजागृती उपक्रम राबविले जात आहेत. जिल्ह्यात अमली पदार्थांची अवैध विक्री, वाहतूक, साठवणूक किंवा सेवनासंदर्भात कोणतीही माहिती मिळाल्यास नागरिकांनी ती तातडीने जवळच्या पोलीस ठाण्यात कळवावी, असे आवाहन रत्नागिरी पोलिसांनी केले आहे. तसेच नागरिकांना ‘रत्नसेतू चॅटबॉट’च्या ९३७१४१५६१२ या क्रमांकावरही माहिती देता येणार आहे. अमली पदार्थांच्या अवैध व्यवहारांना आळा घालण्यासाठी ‘मिशन फिनिक्स’ अंतर्गत अशाच प्रकारच्या कारवाया सातत्याने सुरू राहणार असल्याचे पोलिसांनी स्पष्ट केले आहे.
