नवी दिल्ली : कृत्रिम बुद्धिमत्तेचा (एआय) वाढता वापर लक्षात घेऊन सनदी लेखापाल (सीए) अभ्यासक्रमाच्या शिक्षण आणि प्रशिक्षणात एआयचा समावेश करण्याचा निर्णय घेण्यात आला आहे. विद्यमान अभ्यासक्रमात एआयचा समावेश नसलेल्या विद्यार्थ्यांसाठी ‘ऑरा’ हा स्वतंत्र प्रशिक्षण अभ्यासक्रम सुरू करण्यात आला असून, आगामी नव्या अभ्यासक्रमात एआयचा समावेश करण्याची प्रक्रिया सुरू असल्याची माहिती इन्स्टिट्यूट ऑफ चार्टर्ड अकाउंटंट्स ऑफ इंडियाचे (आयसीएआय) अध्यक्ष सीए प्रसन्ना कुमार डी. यांनी दिली.
एआयमुळे बदलत्या वातावरणात सीएना आवश्यक कौशल्ये विकसित करण्याची संधी उपलब्ध करून देणे, विद्यमान विद्यार्थ्यांना स्वतंत्र प्रशिक्षण देणे आणि भविष्यातील अभ्यासक्रमात एआयचा समावेश करणे, या माध्यमातून सीए शिक्षणात तंत्रज्ञानाधारित बदलांना स्थान देण्याची प्रक्रिया संस्थेने सुरू केली आहे. एआय हा अभ्यासक्रमाचा स्वतंत्र पूरक विषय न राहता तो अभ्यासक्रमातच समाविष्ट करण्यात येणार असल्याचे प्रसन्ना कुमार डी. यांनी सांगितले. आयसीएआयने एआयच्या क्षेत्रात काम करण्यासाठी बाहेरील तज्ज्ञांवर पूर्णपणे अवलंबून राहण्याऐवजी तंत्रज्ञान क्षेत्रात कार्यरत असलेल्या सीएंच्या अनुभवाचा उपयोग केला आहे. अनेक सीए आधीपासूनच माहिती-तंत्रज्ञान आणि एआयच्या क्षेत्रात कार्यरत असून, त्यांच्या अनुभवातून एआयशी संबंधित अभ्यासक्रम विकसित करण्यात आला आहे. यासाठी मोठ्या प्रमाणात शिक्षकांची मदत घेतल्याचेही प्रसन्ना कुमार डी. यांनी सांगितले. सध्या अनेक विद्यार्थी सीएचे शिक्षण घेत आहेत. त्यांच्या अभ्यासक्रमात कृत्रिम बुद्धिमत्तेशी संबंधित प्रशिक्षणाचा समावेश नसल्याने अशा विद्यार्थ्यांसाठी ‘ऑरा’ अभ्यासक्रम सुरू करण्यात आला आहे. या अभ्यासक्रमाद्वारे विद्यार्थ्यांना ऑनलाइन माध्यमातून एआयच्या विविध पैलूंचे प्रशिक्षण देण्यात येणार आहे. सध्याच्या अभ्यासक्रमात एआयचा समावेश नसलेल्या विद्यार्थ्यांना स्वतंत्र अभ्यासक्रमाच्या माध्यमातून हे प्रशिक्षण उपलब्ध करून देण्याचा प्रयत्न करण्यात येणार आहे. विद्यार्थ्यांनी चार्टर्ड अकाउंटंट म्हणून व्यावसायिक क्षेत्रात प्रवेश करण्यापूर्वी त्यांना एआयच्या वापराबाबत आवश्यक कौशल्ये मिळावीत, या उद्देशाने ‘ऑरा’ हा एआय अभ्यासक्रम राबविला जात असल्याचे उपाध्यक्ष सीए मंगेश किनरे यांनी सांगितले. ‘ऑरा-१’ पूर्ण केलेल्या विद्यार्थ्यांना अधिक प्रगत स्वरूपाचे एआय प्रशिक्षण देण्यासाठी आता ‘ऑरा-२’च्या माध्यमातून प्रशिक्षणाचा पुढील टप्पा सुरू करण्यात येणार आहे. जुलै २०२४ पासून आतापर्यंत जवळपास ५५ हजार सीएंनी प्रशिक्षण घेतले असल्याचे किनरे यांनी सांगितले. आयसीएआयने तीन वर्षांपूर्वी एआयशी संबंधित उपक्रम सुरू केला. त्यानंतर सीएंसाठी तीन दिवसांचा प्रत्यक्ष प्रशिक्षणावर आधारित एआय प्रमाणपत्र अभ्यासक्रम विकसित करण्यात आला. हा अभ्यासक्रम तंत्रज्ञान क्षेत्रात प्रत्यक्ष काम करणाऱ्या चार्टर्ड अकाउंटंट्सनी तयार केला. या अभ्यासक्रमासाठी अन्य संस्थांचा अभ्यासक्रम जशास तसा स्वीकारण्यात न येता आयसीएआयने स्वतःचा अभ्यासक्रम तयार केला. चार्टर्ड अकाउंटंट्सना प्रत्यक्ष व्यवसाय आणि उद्योग क्षेत्रात एआयचा उपयोग कसा करता येईल, तसेच कोणती कामे एआयच्या माध्यमातून सोडवता येऊ शकतात, यावर अभ्यासक्रमाची रचना करण्यात आल्याचे मंगेश किनरे यांनी सांगितले.
