मुंबई : राज ठाकरे यांच्या महाराष्ट्र नवनिर्माण सेनेचं महाराष्ट्राच्या विधानसभेच्या निवडणूकीत काय होतं, याकडे सर्वांचे लक्ष लागलेले होते. कारण यापूर्वी त्यांचा फक्त एक आमदार होता. पण यावेळी त्यांनी आपला मुलगा अमित ठाकरेला माहीममधून निवडणूकीला उभे केले होते. त्यामुळे यावेळी मनसेची जादू चालणार का, याकडे सर्वांचे लक्ष होते. पण या निवडणूकीत मतदारांनी मनसेकडे पाठ फिरवल्याचे पाहायला मिळाले. पण या निवडणूकीत मनसेचे गणित नेमके कुठे चुकले, हे आता समोर आले आहे. मनसेचे एकमेव आमदार राजू पाटील यावेळी जिंकतील, अशी सर्वांनाच आशा होती. पण त्याचबरोबर बाळ नांदगावकर आणि अमित ठाकरे हेदेखील जिंकतील, असा बऱ्याच जणांचा होरा होता. पण जेव्हा निवडणूकीचे निकाल यायला लागले तेव्हा मनसेचा एकही उमेदवार आघाडीवर नव्हता. राज ठाकरे यांनी भाजपाबरोबर लोकसभेला युती केली होती. एकनाथ शिंदे यांच्याबरोबरही त्यांचे चांगले संबंध होते. पण विधानसभेच्या निवडणूकीत मात्र हेच गणित बिनसल्याचे पाहायला मिळाले.
मनसेने विधानसभा निवडणूकीत शिंदे गटाचे जिथे उमेदवार होते तिथे आपले उमेदवार उभे केले. भाजपाने त्यांना पाठिंबा दिला असला तरी राज ठाकरे यांनी शिंदे गटाच्या उमेदवारापुढे जास्त उमेदवार उभे करणे, इथेच त्यांचे गणित फसले. कारण एकनाथ शिंदे स्वत: महाराष्ट्राचे मुख्यमंत्री होते. बऱ्याच योजना त्यांनी निवडणूकीपूर्वी आणल्या होत्या. त्यामुळे जनमानसात एकनाथ शिंदे यांच्याबाबत चांगले मत निर्माण व्हायला सुरुवात झाली होती. दुसरीकडे राज ठाकरे यांनी प्रत्येक सभेत एकनाथ शिंदे यांच्यावर टीका केली होती. हे मतदारांना कुठे तरी खुपत होते आणि त्याचाच परीपाक आपल्याला निवडणूकीच्या निकालात पाहायला मिळाला. अमित ठाकरे यांच्यासमोर सदा सरवणकर यांना अखेरपर्यंत तिकीट मिळणार की नाही, याबाबत संदिग्धता होती. त्यावेळी राज ठाकरे यांनी जर सदा सरवणकर यांच्याशी चर्चा केली असती तर कदाचित सदा सरवणकर यांनी माघार घेतली असती आणि अमित ठाकरे यांना यावेळी फायदा झाला असता. पण राज ठाकरे यांनी सदा सरवणकर यांच्याशी संवाद साधला नाही आणि त्याचा फटकाही त्यांना बसला. राज ठाकरे यांनी यापूर्वी आपण मुलासाठी कोणाशीही चर्चा करणार नाही, असे सांगितले होते. त्यावर राज ठाकरे ठाम राहीले. पण माहीमची जागा मात्र त्यांना गमवावी लागली. राज ठाकरे यांच्या सभांनी यावेळीही गर्दी खेचली, पण या सभांमधील गर्दीचे मतांमध्ये मात्र रुपांतर झाले नाही. त्यामुळे राज ठाकरे फॅक्टर या निवडणूकीत तरी चालला नाही, असे चित्र महाराष्ट्रात स्पष्टपणे दिसत होते.
