ठाणे : नागरिकांपर्यंत शासनाच्या विविध योजना, विकासकामे आणि लोकहिताच्या उपक्रमांची अधिकृत व अद्ययावत माहिती जलद, पारदर्शक आणि विश्वासार्ह पद्धतीने पोहोचविण्याच्या उद्देशाने ठाणे जिल्हा परिषदेने अधिकृत Public App खाते सुरू केले आहे. डिजिटल माध्यमांचा वाढता वापर लक्षात घेऊन नागरिकांना अधिकृत माहिती सहज उपलब्ध व्हावी, यासाठी हा उपक्रम सुरू करण्यात आला असून, या माध्यमातून जिल्हा परिषदेमार्फत राबविण्यात येणाऱ्या विविध योजना, विकासकामे, प्रेसनोट, जनजागृती मोहिमा आणि महत्त्वाच्या सूचना नियमितपणे नागरिकांपर्यंत पोहोचवल्या जाणार आहेत. तसेच आरोग्य, शिक्षण, ग्रामविकास, समाजकल्याण, महिला व बालविकास, पाणीपुरवठा, कृषी आणि इतर विभागांच्या योजनांची माहिती, निविदा, यशोगाथा तसेच आपत्कालीन परिस्थितीतील आवश्यक सूचना देखील या व्यासपीठावर उपलब्ध करून दिल्या जाणार आहेत. अधिकृत स्रोतावरून माहिती उपलब्ध होत असल्याने नागरिकांना अफवा किंवा अप्रमाणित माहितीवर अवलंबून राहण्याची गरज भासणार नाही, असा विश्वास प्रशासनाने व्यक्त केला आहे.
जिल्हा परिषद, ठाणेचे मुख्य कार्यकारी अधिकारी रणजित यादव यांनी सांगितले की, डिजिटल युगात शासनाची माहिती नागरिकांपर्यंत जलद, अचूक आणि विश्वासार्ह पद्धतीने पोहोचणे अत्यंत आवश्यक आहे. अधिकृत Public App खाते प्रशासन आणि नागरिक यांच्यातील संवाद अधिक प्रभावी करण्यासाठी महत्त्वाचे माध्यम ठरेल. शासनाच्या विविध योजना, विकासकामे आणि लोकहिताच्या उपक्रमांची माहिती प्रत्येक नागरिकापर्यंत वेळेत पोहोचावी, हा या उपक्रमामागील मुख्य उद्देश असल्याचे त्यांनी स्पष्ट केले. दरम्यान, जिल्हा परिषद, ठाणेची अधिकृत Facebook, Instagram, YouTube आणि X (Twitter) ही सोशल मीडिया खाती यापूर्वीपासून कार्यरत असून, आता त्यासोबत Public App च्या माध्यमातूनही अधिकृत माहिती उपलब्ध करून दिली जाणार आहे. नागरिकांनी शासनाच्या योजनांची विश्वासार्ह माहिती मिळविण्यासाठी जिल्हा परिषद, ठाणेच्या अधिकृत Public App तसेच इतर अधिकृत सोशल मीडिया खात्यांना फॉलो करून सहकार्य करावे, असे आवाहन जिल्हा परिषदेच्या जनसंपर्क अधिकारी रेश्मा आरोटे यांनी केले आहे.
