ठाणे : सेवा संकल्प अभियानांतर्गत ठाणे जिल्ह्यातील ग्रामीण भागात ‘हर घर जल’ आणि ‘जल अर्पण’ गावे घोषित करण्याच्या प्रक्रियेला वेग देण्यात आला आहे. प्रत्येक ग्रामीण कुटुंबाला नळाद्वारे नियमित, सुरक्षित आणि शुद्ध पिण्याचे पाणी उपलब्ध करून देण्याबरोबरच जलस्रोतांचे संवर्धन, पुनर्भरण आणि पाणी बचतीला चालना देण्यावर या अभियानात विशेष भर दिला जात आहे. ग्रामीण पाणीपुरवठा विभागाचे कार्यकारी अभियंता संजय वेंगुर्लेकर यांनी ही माहिती दिली. ‘हर घर जल’ संकल्पनेनुसार गावातील प्रत्येक घरापर्यंत नळ जोडणी पोहोचवून नियमित आणि कार्यक्षम पाणीपुरवठा सुनिश्चित करण्यात येणार आहे. सर्व कुटुंबांना नळजोडणी उपलब्ध असून पाणीपुरवठा समाधानकारक असल्याची खात्री झाल्यानंतर संबंधित गावाला ‘हर घर जल’ गाव म्हणून घोषित करण्यात येणार आहे. त्याचबरोबर ‘जल अर्पण’ उपक्रमांतर्गत जलस्रोतांचे संवर्धन, भूजल पुनर्भरण, पाण्याचा काटकसरीने वापर आणि जलसुरक्षेबाबत ग्रामस्थांमध्ये व्यापक जनजागृती केली जाणार आहे. गावातील पाणीपुरवठा योजना आणि जलस्रोत अधिक शाश्वत करण्यासाठी आवश्यक उपाययोजनाही राबविण्यात येत आहेत.
या अभियानाच्या यशस्वी अंमलबजावणीसाठी ग्रामपंचायत, पाणी व स्वच्छता विभाग, जल जीवन मिशन, संबंधित अधिकारी-कर्मचारी, महिला बचत गट, आशा व अंगणवाडी सेविका तसेच ग्रामस्थांचा सक्रिय सहभाग घेतला जात आहे. गावपातळीवरील पडताळणी, ग्रामसभेतील ठराव आणि शासनाने निश्चित केलेल्या निकषांची पूर्तता झाल्यानंतर पात्र गावांना ‘हर घर जल’ आणि ‘जल अर्पण’ गाव म्हणून घोषित करण्यात येणार आहे. जिल्हा परिषदेचे मुख्य कार्यकारी अधिकारी रणजित यादव यांनी पाणीपुरवठा सुविधा निर्माण करण्याबरोबरच जलस्रोतांचे संवर्धन, पाणी बचत आणि उपलब्ध पाण्याचा योग्य वापर ही प्रत्येकाची सामूहिक जबाबदारी असल्याचे सांगितले. सेवा संकल्प अभियानाच्या माध्यमातून ग्रामस्थांचा सक्रिय सहभाग वाढवून जलसुरक्षित आणि जलसमृद्ध गावांची निर्मिती करण्यासाठी प्रभावीपणे कार्यवाही करण्याचे निर्देशही त्यांनी दिले. जिल्हा परिषद, ठाणे यांनी सर्व ग्रामस्थांना या अभियानात सहभागी होऊन आपल्या गावाला ‘हर घर जल’ आणि ‘जल अर्पण’ गाव म्हणून पात्र ठरविण्यासाठी सहकार्य करण्याचे आवाहन केले आहे.
