ठाणे : लोकसभा निवडणुकीच्या पार्श्वभूमीवर अवैध मद्यनिर्मिती, विक्री आणि वाहतूक रोखण्यासाठी उत्पादन शुल्क विभागाकडून ठाणे जिल्ह्यात विशेष उपाययोजना केल्या आहेत. संशयित आणि सराईत आरोपींवर विशेष लक्ष ठेण्यात येणार असून, रात्री उशिरापर्यंत गस्त घालण्याच्या सूचना अधिकाऱ्यांना देण्यात आलेल्या आहेत. जिल्ह्यात तात्पुरते तपासणी नाके आणि क्यूआरटी पथकाची स्थापना केली असून, विशेष भरारी पथकाची सर्वत्र करडी नजर असणार आहे. जिल्ह्यातील सर्व किरकोळ आणि घाऊक दुकानांमध्ये सीसीटीव्ही कॅमेरे बसवणे अनिवार्य करण्यात आले आहे. माहिती उत्पादन शुल्कचे ठाणे जिल्हा अधीक्षक डॉ. निलेश सांगडे यांनी ही माहिती दिली आहे. ठाणे जिल्ह्यात शिरसाड फाटा (पिवळी), पडघा टोल नाका (भिंवडी), मुंब्रा बायपास टोलनाका येथे प्रत्येकी दहा दुय्यम निरीक्षक दर्जाच्या अधिकाऱ्यांची नियुक्ती केली असून, या तात्पुरत्या तपासणी नाक्यावर नाकाबंदी करून संशयास्पद वाहनांची तपासणी करण्यात येणार आहे. जेणेकरून अवैध मद्य वाहतुकीवर आळा घालता येईल.
अवैध मद्यनिर्मिती, विक्री आणि वाहतुकींबाबत तक्रार आल्यास तत्काळ कारवाई करण्यासाठी उत्पादन शुल्कच्या ठाणे कार्यालयात शीघ्र प्रतिसाद पथकाची (क्यूआरटी) स्थापना करण्यात आली आहे. ठाणे जिल्ह्यात उत्पादन शुल्कचे एक भरारी पथकासह विभागीय उपायुक्त यांचेही एक भरार पथक अशी दोन फरारी पथके कार्यरत आहेत. या पथकांमार्फत मद्य तस्करी रोखण्यासाठी दक्षता घेण्यात येत आहे. त्याशिवाय, कार्यरत अधिकारी, कर्मचाऱ्यांमधून विशेष भरारी पथकाची स्थापना करण्यात आली आहे. या पथकामार्फत कारवाईचा बडगा उगारण्यात येणार आहे. विभागीय निरीक्षक आणि त्यांच्या अंतर्गत असलेले अधिकारी, कर्मचाऱ्यांना त्यांच्या कार्यक्षेत्रामध्ये रात्री उशिरापर्यंत गस्त घालून अवैध मद्यविक्री, वाहतुकीवर कारवाई करण्याच्या सूचना देण्यात आलेल्या आहेत. तसेच, मद्य परवानाधारकांकडून नियम, तरतुदी, अटींचे उल्लंघन होणार नाही याबाबत दक्षता घेण्याचे निर्देश दिले आहेत. मद्य तस्करी करणाऱ्या सराईत आरोपींवर विशेष लक्ष ठेवण्याच्या सूचना विभागीय निरीक्षकांना देण्यात आलेल्या आहेत. या आरोपींवर कलम ९२ अंतर्गत कारवाई करून बंधपत्राचे उल्लंघन झाल्यास आरोपींवर ‘एमपीडीए’ कायद्यातंर्गत कारवाई करण्यात येणार आहे. जिल्ह्यातील सर्व घाऊक आणि किरकोळ दुकानांमध्ये सीसीटीव्ही कॅमेरे बसवण्याबाबत अनिवार्य केले असून, त्याचा बॅकअप किमान दहा दिवस ठेवण्याच्या सूचना उत्पादन शुल्ककडून देण्यात आलेल्या आहेत. य़ाकडेही अधिकारी लक्ष ठेऊन असणार आहेत. ठाणे जिल्ह्यातील सर्व किरकोळ मद्य विक्रेत्यांनी प्रत्येक दिवशी होणारी मद्यविक्रीची माहिती अद्ययावत ठेवण्याचे निर्देश उत्पादन शुल्क विभागाने दिले आहेत. तसेच, ही माहिती विभागीय स्तरावर संकलित करण्याविषयी सर्व विभागीय निरीक्षकांना सांगण्यात आले आहे. जंगलात, खाडीकिनारी किंवा इतर ठिकाणी हातभट्टी लावून दारूची निर्मिती केली जात असून, या हातभट्ट्यांवर उत्पादन शुल्ककडून धाडी टाकून हातभट्ट्या उद्धवस्त केल्या जात आहेत. लोकसभा निवडणुकीच्या अनुषंगाने ही कारवाई आणखीन तीव्र केली जाणार असून, अवैध हातभट्टी आणि मद्य विक्री केंद्रावर विविध अधिकाऱ्यांनी एकत्रित धाडी टाकण्याचे नियोजन केले आहे.
