मुंबई : एक धक्कादायक घटना मुंबईत घडली आहे. या घटनेमुळे माणुसकी कशी संपून गेली हेही समोर आले आहे. गुंगीत असणारा प्रवासी मुंबईला शिवनेरीने पोहोचला तेव्हा शिवनेरी स्टँडवरील कर्मचाऱ्यांनी हा माणूस नशेत असावा, म्हणून त्यांना रस्त्याच्या कडेला कचऱ्याच्या ढिगाऱ्याजवळ फुटपाथवर सोडून दिले. तब्बल १६ तास हा माणूस फुटपाथवर बेवारस अवस्थेत पडून राहिला. त्यांचे कपडे, राहणीमान बघून कोणालाही विचारपूस करावी वाटली नाही. त्यांचा शोध घेत असलेल्या नातेवाईकांनी त्यांना ओळखून रुग्णालयात नेले. त्यानंतर तब्बल ८० तासांनी ते गृहस्थ शुद्धीवर आले. शैलेंद्र साठे हे पुण्यात पत्नी आणि मुलांसोबत राहतात. ते दुबईतून पुण्यात जूनमध्ये स्थायिक झाले आहेत. १४ जून सकाळी साडेदहा वाजता वाकड येथून त्यांनी मुंबईसाठी शिवनेरी बस पकडली. प्रवासादरम्यान शेजारी बसलेल्या अनोळखी प्रवाशाने संवाद साधण्याचा प्रयत्न केला. दुपारी दोनच्या सुमारास बस पुणे-मुंबई एक्स्प्रेस वेवरील खालापूर येथील फूड मॉलकडे थांबली, साठे बसमधून उतरले. आईस्क्रीम खाऊन पुन्हा बसमध्ये चढणार तोच सहप्रवासी कॉफी घेऊन त्यांच्या समोर आला. त्यांनी कोणतीही शंका न घेता सहप्रवाशाने आणलेली कॉफी घेतली आणि बसमध्ये बसले. त्यानंतर काही मिनिटांतच ते बेशुद्ध झाले. प्रवासादरम्यान सहप्रवाशाने हातात रुमाल ठेवून ५३ ग्रॅम दागिने, मोबाईल, महागडे घड्याळ आणि किमती ऐवज लुटला. विशेष म्हणजे बसमध्ये सीसीटीव्ही आणि अन्य प्रवासी असताना कोणाचेही त्याकडे लक्ष गेलं नाही.
बस दादरला पोहोचली. बसमध्ये बेशुद्ध पडलेल्या साठे यांना शिवनेरीच्या कर्मचारी आणि सुरक्षा रक्षकांनी बसमधून उतरवून थेट कचऱ्याच्या ढिगाऱ्याच्या शेजारील फुटपाथवर ठेवून ते निघून गेले. साठे तब्बल १६ तास फुटपाथवर बेवारस पडून होते. टॅक्सी चालक, पादचारी त्यांना बघत होते. चौकशीही करत होते; मात्र कोणीही मदतीसाठी पुढाकार घेतला नाही. पोलिसांनाही कळवले नाही. साठे यांच्याशी संपर्क होत नसल्याने कुटुंबीय घाबरले. मित्र-नातेवाइकांकडे चौकशी सुरू झाली. मोबाइल लोकेशन चेंबूर परिसरात बंद झाल्यामुळे गोवंडी पोलीस ठाण्यातही चौकशी केली. अखेर, त्यांच्या पत्नीने दादर परिसरात राहणाऱ्या त्यांच्या माहेरच्या मंडळींना याबाबत कळवून शोध घेण्यास सांगितले. शिवनेरीने चेंबूर येथे उतरणार असल्याने काही जणांनी चेंबूर येथे धाव घेतली. एका मेहुण्याने दादर शिवनेरी बस थांब्याकडे चौकशी सुरू केली. अखेर, चौकशीदरम्यान एक जण रस्त्यावर पडल्याची माहिती मिळाली. त्यांनी तिथे धाव घेतली तेव्हा साठे बेशुद्धावस्थेत पडलेले दिसून आले. त्यांना तत्काळ जवळच्या ज्युपिटर रुग्णालयात दाखल केले. ते पूर्णपणे डिहायड्रेटेड झाले होते. त्यांना रुग्णालयात आणण्यासाठी थोडा उशीर झाला असता तर त्यांच्या जीवावर बेतले असते, असे डॉक्टरांनी सांगितले.
