कोल्हापूर : महाराष्ट्र आणि उत्तर कर्नाटकातील लाखो भाविकांचे श्रद्धास्थान असलेल्या नांदणी (ता. शिरोळ) येथील स्वस्तिश्री भट्टारक पट्टाचार्य महास्वामी संस्थान मठातील लाडकी महादेवी उर्फ माधुरी हत्तीणीचे तब्बल ४०९ दिवसांनंतर नांदणीत पुनरागमन झाले. मध्यरात्री दीड वाजता ती मठ परिसरात दाखल होताच हजारो भाविकांनी फुलांची उधळण करत आणि ‘लाडकी महादेवी’च्या घोषणांनी तिचे जल्लोषात स्वागत केले. सव्वा वर्षाच्या प्रतीक्षेनंतर महादेवी परतल्याने संपूर्ण परिसरात आनंदाचे वातावरण निर्माण झाले. हा भावनिक क्षण पाहताना संस्थानचे प्रमुख स्वस्तिश्री भट्टारक पट्टाचार्य महास्वामी यांनाही अश्रू अनावर झाले. महादेवीच्या निवासासाठी स्वतंत्र व्यवस्था करण्यात आली असून, तिच्या देखभालीसाठी आवश्यक सर्व सुविधा उपलब्ध करून देण्यात आल्या आहेत. गुजरातमधील जामनगर येथील वनतारा हत्ती पुनर्वसन केंद्रातून ४२ कर्मचाऱ्यांसह महादेवीला सुरक्षितपणे नांदणीत आणण्यात आले. वनविभाग, वनतारा टीम आणि वैद्यकीय पथकाच्या उपस्थितीत तिला विशेष तयार करण्यात आलेल्या ‘माधुरी निवासस्थानी’ उतरवण्यात आले. तिच्या स्वागतासाठी किनी टोलनाका ते नांदणी गावातील गांधी चौकापर्यंत शेकडो भाविकांनी गर्दी केली होती. गावभर रांगोळ्या काढून आणि फुलांची उधळण करत महादेवीचे स्वागत करण्यात आले. या सोहळ्यास वनताराचे मुख्य कार्यकारी अधिकारी विहान करणी, नांदणी मठाचे स्वस्तिश्री जिनसेन भट्टारक पट्टाचार्य महास्वामी, विविध मठांचे धर्मगुरू, खासदार, आमदार आणि अनेक मान्यवर उपस्थित होते.
महादेवीच्या आगमनामुळे नांदणी गावात सणासारखे वातावरण निर्माण झाले होते. मध्यरात्री असूनही बालकांपासून ज्येष्ठांपर्यंत नागरिक मोठ्या संख्येने रस्त्यावर उपस्थित होते. महादेवीचे दर्शन घेण्यासाठी आणि तिची छबी आपल्या कॅमेऱ्यात टिपण्यासाठी भाविकांमध्ये उत्साहाचे वातावरण होते. ढोल-ताशांच्या गजरात आणि साखर-पेढे वाटून ग्रामस्थांनी आनंदोत्सव साजरा केला. मोठ्या प्रमाणावर भाविकांची गर्दी लक्षात घेऊन कोणताही अनुचित प्रकार घडू नये यासाठी जिल्हा पोलीस दलाने कडक बंदोबस्त ठेवला होता. यासाठी २५ पोलीस अधिकारी, १०० हून अधिक पोलीस कर्मचारी तसेच गृहरक्षक दलाची टीम तैनात करण्यात आली होती. दरम्यान, वनतारा हत्ती संगोपन केंद्रात गेल्या सव्वा वर्षभर महादेवीवर आवश्यक वैद्यकीय उपचार करून तिची विशेष काळजी घेण्यात आली. उपचारानंतर ती पूर्णपणे निरोगी झाल्याने तिला नांदणी मठात परत आणण्यात आले आहे. मठातही तिच्यासाठी वैद्यकीय सुविधा, देखभाल आणि निवासाची संपूर्ण व्यवस्था करण्यात आली असून तज्ज्ञांचे पथक सतत तिच्या आरोग्यावर लक्ष ठेवणार आहे. महादेवीला एका वर्षाच्या आत नांदणीत परत आणण्याचे दिलेले आश्वासन पूर्ण झाल्याचा आनंद व्यक्त करत वनताराचे मुख्य कार्यकारी अधिकारी विहान करणी यांनी ही भाविकांसाठी अत्यंत आनंदाची घटना असल्याचे सांगितले. महादेवीच्या पुनरागमनाने नांदणीतील भाविकांच्या श्रद्धेला नवी उभारी मिळाली असून हा दिवस गावाच्या इतिहासातील अविस्मरणीय क्षण म्हणून स्मरणात राहणार आहे.
