पुणे : देशात बॉम्बस्फोट घडविण्याच्या तयारीत असलेल्या दहशतवाद्यांनी वास्तव्य केलेली कोंढव्यातील इमारत राष्ट्रीय तपास यंत्रणेने (एनआयए) जप्त केली. दरम्यान, या दहशतवाद्यांनी मुंबई-पुण्यासह गुजरातमधील महत्वाच्या शहरांमध्ये बॉम्बस्फोट घडविण्याच्या तयारी केली होती, असेही तपासात समोर आले होते. तर, कोंढव्यात त्यांनी बॉम्ब तयार करण्याचे प्रशिक्षण घेतले होते. एनआयएने मोहम्मद शहानाझ आलम, रिजवान अली, अब्दुलाह शेख, तलाह लियाकत खान, मोहम्मद इम्रान मोहम्मद युसुफ खान उर्फ मटका उर्फ अमीर अब्दुल हमिद खान (रा. रतलाम, मध्य प्रदेश), मोहम्मद युनुस मोहम्मद याकुब साकी उर्फ अदिल उर्फ अदिल सलीम खान (रा. रतलाम, मध्य प्रदेश), कादीर दस्तगिर पठाण उर्फ अब्दुल कादीर, समीब नासीरउद्दीन काझी (दोघे रा. कोंढवा, पुणे), जुल्फीकार अली बडोदवाला उर्फ लालाभाई उर्फ लाला उर्फ सईफ, शमिल साकिब नाचन व आकिफ अतिक नाचन (तिघेही रा. पडघा, ठाणे) यांना अटक केली आहे. पुणे पोलिसांनी कोथरूड परिसरात मध्यरात्री गस्त घालत असताना दुचाकी चोरीच्या प्रयत्नात असताना तिघांना पकडले होते. एकजन पळून गेला होता. दोघांच्या चौकशीत हे वॉन्टेड दहशतवादी असल्याचे समोर आले होते.
यादरम्यान, मोहम्मद याला कोंढव्यात नेले असता तो पसार झाला होता. यानंतर २ नोव्हेंबर २०२३ रोजी दिल्ली पोलिसांच्या स्पेशल सेलने त्याला पकडले होते. त्याला तपासासाठी एनआयएने ताब्यात घेतल्यानंतर या दहशतवाद्यांनी सातारा जिल्ह्यातील एका सराफी दुकानात दरोडा टाकून रोकड लुटली होती. तसेच, त्यांनी बॉम्बस्फोटाचे साहित्य खरेदी केले होते. कोंढव्यात त्यांनी बॉम्ब कसा तयार करायचा याबाबतचे प्रशिक्षण घेतले होते. कोल्हापूर, सातारा परिसरातील जंगलात त्यांनी नियंत्रित पद्धतीने बॉम्बस्फोट केले होते. त्यांनी शस्त्र चालविण्याचे प्रशिक्षण घेतल्याचे तपासात उघड झाले. याप्रकरणात मोहम्मद आलम, रिजवान अली. अब्दुलाह शेख यांच्याविरुद्ध मुंबईतील विशेष न्यायालयात नुकतेच आरोपपत्र दाखल केले. त्यानंतर एनआयएने कोंढव्यातील मीठानगर परिसरातील इमारत जप्त केली आहे.