सावंतवाडी : कोकण रेल्वे मार्गावरील ‘सावंतवाडी रेल्वे स्टेशन टर्मिनस’चे नाव बदलून ‘लोकमान्य मधू दंडवते टर्मिनस’ करण्याच्या प्रक्रियेला प्रशासकीय स्तरावर वेग आला आहे. ज्येष्ठ स्वातंत्र्यसेनानी, ज्येष्ठ संसदपटू आणि भारताचे माजी केंद्रीय मंत्री स्व. मधू दंडवते यांनी कोकणाच्या विकासासाठी, विशेषतः कोकण रेल्वेच्या उभारणीत दिलेल्या महत्त्वपूर्ण योगदानाच्या सन्मानार्थ टर्मिनसला त्यांचे नाव देण्याची मागणी अनेक वर्षांपासून होत होती. या मागणीची दखल घेत महाराष्ट्र शासनाने २६ मे २०२६ रोजी झालेल्या मंत्रिमंडळ बैठकीत नामांतराच्या प्रस्तावाला अधिकृत मंजुरी दिली. त्यानंतर राज्याचे अप्पर मुख्य सचिव (परिवहन व बंदरे) संजय सेठी यांनी १६ जून २०२६ रोजी केंद्रीय गृह सचिवांना पत्र पाठवून या प्रस्तावावर केंद्र सरकारने लवकर निर्णय घ्यावा, अशी विनंती केली. राज्य शासनाचा प्रस्ताव प्राप्त झाल्यानंतर केंद्रीय गृह मंत्रालयानेही नामांतर प्रक्रियेला गती दिली असून, २७ जुलै २०२६ रोजी गृह मंत्रालयाचे अवर सचिव कुंदन कुमार यांनी कार्यालयीन ज्ञापन जारी केले. या ज्ञापनाद्वारे केंद्र सरकारच्या नियमांनुसार प्रस्तावाची प्रत विविध केंद्रीय मंत्रालये आणि संबंधित विभागांकडे अभिप्रायासाठी पाठविण्यात आली आहे.
नामांतराचा अंतिम निर्णय घेण्यापूर्वी केंद्रीय गृह मंत्रालयाने रेल्वे मंत्रालय (रेल्वे बोर्ड), विज्ञान व तंत्रज्ञान मंत्रालय, भारतीय सर्वेक्षण विभाग (Survey of India) आणि टपाल विभाग यांच्याकडून अधिकृत मते व अभिप्राय मागवले आहेत. संबंधित सर्व विभागांकडून सकारात्मक अभिप्राय आणि मंजुरी मिळाल्यानंतर केंद्रीय गृह मंत्रालयाकडून ‘सावंतवाडी रेल्वे स्टेशन टर्मिनस’चे नाव अधिकृतपणे ‘लोकमान्य मधू दंडवते टर्मिनस’ असे घोषित करणारी अंतिम अधिसूचना जारी केली जाणार आहे. सावंतवाडी टर्मिनसला लोकमान्य मधू दंडवते यांचे नाव देण्याची मागणी विविध सामाजिक व स्थानिक संघटनांकडून सातत्याने करण्यात येत होती. कोकण रेल्वेच्या उभारणीत आणि कोकणाच्या विकासात त्यांच्या योगदानाचा गौरव व्हावा, या उद्देशाने राज्य सरकारने हा प्रस्ताव केंद्राकडे पाठवला असून, आता आवश्यक प्रशासकीय प्रक्रिया अंतिम टप्प्यात पोहोचली आहे. त्यामुळे सर्व संबंधित विभागांचा अभिप्राय प्राप्त झाल्यानंतर सावंतवाडी टर्मिनसच्या नामांतरावर लवकरच अधिकृत शिक्कामोर्तब होण्याची शक्यता व्यक्त केली जात आहे.
