मुंबई : राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांच्या सिल्व्हर ओक बंगल्यावरील लॅण्डलाइन फोनकरून त्यांना ठार मारण्याची धमकी देणाऱ्या आरोपीला गिरगाव दंडाधिकारी न्यायालयाने चांगलाच दणका दिला आहे. न्यायालयाने आरोपी नारायणकुमार सोनी याला दोषी ठरवून दीड वर्षे सश्रम कारावासाची शिक्षा ठोठावली आहे. शरद पवार यांच्या सिल्व्हर ओक बंगल्यावर २ डिसेंबर २०२२ रोजी सकाळी ७ वाजण्याच्या सुमारास नारायणकुमार याने फोन केला आणि पवार यांना जीवे मारण्याची धमकी दिली. त्यानंतर रात्री ८.२० वाजेपर्यंत वारंवार कॉल करून त्रास दिला. याप्रकरणी टेलिफोन ऑपरेटर कृष्णा देऊळकर यांनी माहिती दिल्यानंतर गावदेवी पोलिसांनी गुन्हा दाखल केला आणि नारायणकुमार याला ताब्यात घेतले.
सोनीला १४ डिसेंबर २०२२ रोजी अटक करण्यात आली. तेव्हापासून तो तुरुंगात आहे. या गुन्ह्याच्या खटल्यात पोलिसांनी गिरगाव दंडाधिकारी न्यायालयात पुरावे सादर केले. हे पुरावे ग्राह्य धरून न्यायदंडाधिकारी श्रीकांत निमसे यांनी सोनीला दोषी ठरवले. आरोपीने धमकीचे एक-दोन कॉल्स केलेले नाहीत, तर दीर्घ काळापासून अनेकदा कॉल्स केले. प्रत्येक वेळी अर्वाच्च भाषा वापरून जीवे मारण्याची धमकी दिली. फोन कॉलच्या न्यायवैद्यक अहवालामधून हे स्पष्ट झाले आहे. तसेच फौजदारी दंड संहितेच्या कलम ३६० मधील तरतुदीच्या आधारे आरोपी सोनीची शिक्षा माफ करता येणार नाही, असे स्पष्ट करून न्यायालयाने एका गुन्ह्यात तीन महिने तर जीवे मारण्याची धमकी दिल्याच्या आरोपावरून दीड वर्षांच्या सश्रम कारावासाची शिक्षा सुनावली.
