मुंबई : मुंबईतील सार्वजनिक गणेशोत्सव मंडळांना यंदाच्या गणेशोत्सवाचे वेध लागले असून भाविकांचे श्रद्धास्थान असलेल्या ‘लालबागचा राजा’ सार्वजनिक गणेशोत्सव मंडळाने गणेशोत्सवाच्या तयारीला अधिकृत सुरुवात केली आहे. महाराष्ट्रासह देश-विदेशातील लाखो भाविकांचे आकर्षण ठरणाऱ्या ‘लालबागचा राजा’च्या श्री गणेश मुहूर्त पूजनाचा सोहळा मंगळवारी पहाटे पार पडला. यानिमित्ताने यंदाच्या सजावटीची संकल्पना काय असणार, याबाबत उत्सुकता वाढली आहे. यावर्षी १४ ते २५ सप्टेंबरदरम्यान गणेशोत्सव साजरा होणार असून विविध मंडळांनी तयारीला सुरुवात केली आहे. शतक महोत्सवी वर्ष साजरे करणाऱ्या अनेक मंडळांनी समाजोपयोगी उपक्रम हाती घेतले आहेत. ‘लालबागचा राजा’ सार्वजनिक गणेशोत्सव मंडळही पुस्तकपेढी, अभ्यासिका, मूत्रपिंड विकारग्रस्त रुग्णांसाठी माफक दरातील डायलिसिस सेवा तसेच गरजू रुग्णांना आर्थिक मदत अशा विविध सामाजिक उपक्रमांद्वारे समाजसेवा करत आहे. यंदा मंडळाचे ९३ वे वर्ष असून दरवर्षीप्रमाणे ९ जून रोजी श्री गणेश मुहूर्त पूजनाचे आयोजन करण्यात आले होते.
मंडळाचे अध्यक्ष बाळासाहेब सुदाम कांबळे यांच्या हस्ते मंगळवारी पहाटे ५ वाजता श्री गणेश मुहूर्त पूजन विधिवत पार पडले. यावेळी मंडळाचे खजिनदार मंगेश दत्ताराम दळवी यांच्या हस्ते मंडळाच्या पावती पुस्तकांचेही पूजन करण्यात आले. या कार्यक्रमाला मंडळाचे पदाधिकारी, कार्यकर्ते आणि सदस्य मोठ्या संख्येने उपस्थित होते. पारंपरिक विधी आणि भक्तिमय वातावरणात पार पडलेल्या या सोहळ्यामुळे गणेशोत्सवाच्या तयारीला वेग आला आहे. मुहूर्त पूजनानंतर आता गणेश कार्यशाळेत ‘लालबागचा राजा’च्या मूर्तीच्या निर्मितीला सुरुवात करण्यात येणार आहे. त्यामुळे भाविकांमध्ये उत्साहाचे वातावरण निर्माण झाले असून यंदाच्या गणेशोत्सवात ‘लालबागचा राजा’ कोणत्या विशेष रूपात आणि आकर्षक सजावटीत दर्शन देणार, याकडे सर्वांचे लक्ष लागले आहे.
