मुंबई : धावत्या लोकल रेल्वेमध्ये प्रवाशाची हत्या करून पसार झालेल्या रोशन सुवर्णाचा शोध घेणे रेल्वे पोलिसांसाठी मोठे आव्हान ठरले होते. घटनेनंतर प्रवाशांनी चित्रीत केलेले दृश्य समाजमाध्यमांवर वेगाने पसरत होते. मात्र, आरोपीची स्पष्ट ओळख पटेल असा कोणताही ठोस पुरावा पोलिसांच्या हाती लागत नव्हता. लोकलमधील देखरेख यंत्रणांच्या चित्रफितींमध्ये आरोपीचा चेहरा स्पष्ट दिसत नव्हता. तसेच त्याच्या हालचालींचा माग काढण्यासाठी कोणताही दूरध्वनी किंवा स्थानविषयक पुरावाही उपलब्ध नव्हता. त्यामुळे तपास अधिक गुंतागुंतीचा झाला होता. दरवाजा बंद करण्याच्या किरकोळ वादातून मयंक लोहार या तरुणावर चाकूने वार करून हत्या केल्यानंतर आरोपी रोशन सुवर्णाने बोरिवली स्थानकाजवळ धावत्या लोकलमधून उडी मारली आणि गर्दीचा फायदा घेत रेल्वे रुळांच्या दिशेने पळ काढला. यानंतर रेल्वे पोलीस, गुन्हे शाखा आणि स्थानिक पोलिसांनी संयुक्तपणे तपास सुरू केला. अवघ्या १५ तासांच्या कालावधीत तब्बल ४०० हून अधिक देखरेख यंत्रणांच्या चित्रफितींची तपासणी करण्यात आली. या दरम्यान पोलिसांनी लोकलमधील प्रवाशांचे जबाब नोंदवले आणि त्यांच्या दूरध्वनीतील चित्रफितीही तपासल्या. त्यातील एका चित्रफितीत आरोपीचा चेहरा स्पष्ट दिसत नसला, तरी त्याने परिधान केलेल्या टी-शर्टवरील एका विशिष्ट कंपनीचे छोटेसे चिन्ह पोलिसांच्या नजरेस पडले. हाच तपासातील सर्वात महत्त्वाचा धागा ठरला.
यानंतर पोलिसांनी त्या चिन्हाच्या आधारे तपासाची दिशा बदलली. अंधेरी, बोरिवली आणि परिसरातील शेकडो देखरेख यंत्रणांच्या चित्रफिती पुन्हा तपासून त्यातील टी-शर्टवरील चिन्हाची जुळवाजुळव करण्यात आली. त्याचबरोबर तांत्रिक तपासाच्या मदतीने त्या विशिष्ट कंपनीची माहिती मिळवण्यात आली. पोलिसांनी थेट कंपनीच्या व्यवस्थापनाशी संपर्क साधून उपलब्ध नोंदी आणि कर्मचाऱ्यांच्या माहितीद्वारे त्या प्रकारचा टी-शर्ट वापरणाऱ्या व्यक्तींचा शोध सुरू केला. या तपासातून अवघ्या काही तासांतच तो टी-शर्ट रोशन सुवर्णाशी संबंधित असल्याचे स्पष्ट झाले आणि आरोपीची ओळख निश्चित झाली. त्यानंतर पोलिसांनी त्याच्या संभाव्य ठिकाणांवर पाळत ठेवत सापळा रचला. हत्येच्या घटनेनंतर अवघ्या १५ तासांतच रोशन सुवर्णाला अटक करण्यात पोलिसांना यश आले. पोलीस कोठडीत त्याने गुन्ह्याची कबुली दिल्याची माहिती तपास यंत्रणांनी दिली आहे. अत्यल्प पुराव्यावरून केलेला हा तपास पोलिसांच्या तांत्रिक कौशल्याचा आणि वेगवान तपासाचा उत्कृष्ट नमुना मानला जात असून, एका छोट्याशा टी-शर्टवरील चिन्हामुळे संपूर्ण हत्येचा उलगडा झाल्याची चर्चा सध्या सर्वत्र होत आहे. या कारवाईमुळे गुन्हेगार कितीही चलाख असला तरी एखादी छोटीशी चूक त्याला कायद्याच्या कचाट्यात आणू शकते, हे पुन्हा एकदा अधोरेखित झाले आहे.
