भाईंदर : मिरा-भाईंदर, वसई-विरार पोलीस आयुक्तालयाच्या अंमली पदार्थ विरोधी पथकाने राजस्थानमधील झुंझुनू येथे मेफेड्रोन (एमडी) ड्रग्स तयार करणारी फॅक्टरी उघडकीस आणत सुमारे १०० कोटी रुपयांचा मुद्देमाल जप्त केला आहे. या कारवाईमुळे आंतरराज्य अमली पदार्थ तस्करीचे मोठे जाळे उघड झाले आहे.
मिरा भाईंदर शहरात पोलिसांकडून गस्त घालत असताना तीन महिन्यापूर्वी संशयावरून सहा जणांची झडती घेण्यात आली होती. यावेळी त्यांच्याकडून ५०१.६ ग्रॅम वजनाचा, अंदाजे १ कोटी ३२ हजार रुपये किमतीचा एमडी ड्रग्स, आठ मोबाईल फोन, चार मोटारसायकली असा एकूण लाखो रुपयांचा मुद्देमाल जप्त करण्यात आला होता. याप्रकरणी काशिगाव पोलीस ठाण्यात गुन्हाची नोंद करण्यात आली होती.त्यावरून तपासादरम्यान या प्रकरणातील आणखी चार आरोपींना अटक करण्यात आली. त्यांच्याकडून गुन्ह्यासाठी वापरण्यात आलेली दोन चारचाकी वाहने, एक मोटारसायकल तसेच सहा मोबाईल फोन असा सुमारे २२ लाख रुपयांचा मुद्देमाल जप्त करण्यात आला. त्यानंतर पुढील तपासात फरार आरोपींचा शोध घेत असताना मिळालेल्या माहितीच्या आधारे पोलिसांचे पथक राजस्थान येथे रवाना झाले.१४ डिसेंबर २०२५ रोजी झुंझुनू येथे अनिल विजयपाल सिहाग या आरोपीच्या मालकीची एमडी ड्रग्स निर्मिती करणारी फॅक्टरी उघडकीस आली. या ठिकाणाहून सुमारे १० किलो एमडी ड्रग्स, एमडी तयार करण्यासाठी वापरली जाणारी प्री-कर्सर रसायने तसेच फ्लास्क, मिक्सर, ड्रायर मशीन, वजन काटे, हँड ग्लोव्हज, फिल्टर आदी साधनसामुग्री जप्त करण्यात आली. या सर्व मुद्देमालाची अंदाजे किंमत १०० कोटी रुपये असल्याचे पोलिसांनी सांगितले.
