राज्यात सुट्या म्हशीच्या दुधाचे दर वाढणार; १ सप्टेंबरपासून घाऊक दर ९३ वरून १०२ रुपये!

मुंबई : मुंबई दुग्ध उत्पादक संघाच्या विशेष बैठकीत सुट्या म्हशीच्या दुधाच्या घाऊक दरात वाढ करण्याचा महत्त्वपूर्ण निर्णय घेण्यात आला आहे. वाढत्या उत्पादन खर्चामुळे दुग्ध व्यवसायावर मोठा आर्थिक ताण निर्माण झाल्याने हा निर्णय घेण्यात आल्याचे संघाने स्पष्ट केले आहे. नव्या निर्णयानुसार, १ सप्टेंबर २०२६ पासून सुट्या म्हशीच्या दुधाचा घाऊक दर प्रतिलिटर ९३ रुपयांवरून १०२ रुपये करण्यात येणार आहे. हा सुधारित दर पुढील सहा महिन्यांसाठी लागू राहील आणि त्यानंतर २८ फेब्रुवारी २०२७ रोजी परिस्थितीचा आढावा घेऊन पुढील निर्णय घेतला जाणार आहे. संघाच्या म्हणण्यानुसार, गेल्या काही महिन्यांत जनावरांच्या पशुखाद्याच्या किमतीत २० ते २५ टक्क्यांपर्यंत वाढ झाली आहे. दाणा, तूरचुणी, चणाचुणी, हिरवा व सुका चारा तसेच पेंड यांच्या दरात झालेल्या वाढीमुळे दुधाच्या उत्पादन खर्चात मोठी वाढ झाली आहे. याशिवाय चांगल्या प्रतीच्या दुधाळ म्हशींच्या किमती वाढल्या असून, त्यांचे आरोग्य, औषधोपचार आणि देखभाल यावरील खर्चही लक्षणीय वाढला आहे. त्यामुळे दुग्ध व्यवसाय टिकवून ठेवण्यासाठी दरवाढ अपरिहार्य झाली होती, असे पदाधिकाऱ्यांनी सांगितले. यापूर्वी फेब्रुवारी २०२६ मध्ये घाऊक दर ९१ रुपयांवरून ९३ रुपये करण्यात आला होता. आता पुन्हा ९ रुपयांची वाढ करण्यात आल्याने त्याचा परिणाम किरकोळ बाजारावरही होण्याची शक्यता आहे.

दरवाढीमागे वाढलेला उत्पादन खर्च हा प्रमुख घटक असला, तरी अन्न व औषध प्रशासनाच्या (FDA) भेसळयुक्त आणि कृत्रिम दुधावरील धडक कारवाईचाही महत्त्वाचा प्रभाव असल्याचे संघाने नमूद केले आहे. या कारवाईनंतर ग्राहकांचा शुद्ध दुधाकडे कल वाढला असून, बाजारात सुट्या शुद्ध दुधाची मागणी लक्षणीयरीत्या वाढली आहे. वाढती मागणी आणि मर्यादित पुरवठा यामुळेही दरवाढ आवश्यक ठरल्याचे संघाचे म्हणणे आहे. सध्या पॅकेटबंद दुधाचे दर वेगळे असून, मे २०२६ च्या नोंदीनुसार अमूल गोल्ड आणि मदर डेअरी फुल क्रीम दूध प्रतिलिटर ७२ रुपये, तर अमूल ताजा ६० रुपये दराने उपलब्ध होते. मात्र, १ सप्टेंबरपासून लागू होणारी ही वाढ प्रामुख्याने मुंबई दुग्ध उत्पादक संघाच्या सुट्या म्हशीच्या दुधाच्या घाऊक दरापुरती मर्यादित आहे. विविध ब्रँडच्या पॅकेटबंद दुधाच्या किरकोळ किमती वाढवायच्या की नाहीत, याचा निर्णय संबंधित कंपन्या स्वतंत्रपणे घेणार आहेत. दरम्यान, सप्टेंबरपासून गणेशोत्सव, नवरात्र आणि दिवाळीसारखे मोठे सण सुरू होत असल्याने दूध, खवा, दही, तूप, पेढे आणि मिठाई यांसारख्या दुग्धजन्य पदार्थांची मागणी वाढणार आहे. त्यामुळे घाऊक दरातील वाढीचा परिणाम किरकोळ बाजारात दिसून येण्याची आणि सणासुदीच्या काळात दुग्धजन्य पदार्थांच्या किमती वाढण्याची शक्यता व्यक्त केली जात आहे.