मुंबई : चर्चगेट येथील अनेक दशकांपासून लोकप्रिय असलेल्या Rustom Ice Cream पार्लरवर अन्न सुरक्षा नियमांचे गंभीर उल्लंघन केल्याप्रकरणी अन्न व औषध प्रशासनाने (एफडीए) मोठी कारवाई करत त्याचे अन्न व्यवसाय परवाना (लायसन्स) तात्काळ निलंबित केले आहे. एफडीएचे आयुक्त तुकाराम मुंढे यांच्या मार्गदर्शनाखाली राज्यभर राबविण्यात येत असलेल्या ‘सुरक्षित अन्न, सुरक्षित महाराष्ट्र’ या विशेष मोहिमेअंतर्गत ही कारवाई करण्यात आली. प्रयोगशाळेचा अंतिम अहवाल प्राप्त होईपर्यंत संबंधित पार्लर बंद ठेवण्याचे आदेश प्रशासनाने दिले आहेत. तपासणीदरम्यान अन्न सुरक्षा अधिकाऱ्यांना आईस्क्रीम तयार करण्याच्या व साठवणुकीच्या ठिकाणी मोठ्या प्रमाणात अस्वच्छता आढळून आली. उत्पादन क्षेत्रात जिवंत उंदीर आणि माश्यांचा वावर असल्याचे निदर्शनास आले. तसेच आईस्क्रीम सुरक्षित तापमानात ठेवण्यासाठी आवश्यक असलेली कोल्ड चेन प्रणाली योग्य प्रकारे राखण्यात आलेली नसल्याचेही स्पष्ट झाले. याशिवाय पिस्ता, पायनॅपल, स्ट्रॉबेरी, ब्लॅक करंट आणि रम जमैका यांसारख्या फ्लेवर्ससाठी वापरले जाणारे कालबाह्य कृत्रिम फ्लेवर्स व इसेन्सचा साठा जप्त करून जागेवरच नष्ट करण्यात आला.
एफडीएने उत्पादनाच्या गुणवत्तेबाबतही गंभीर निरीक्षण नोंदवले आहे. यापूर्वी करण्यात आलेल्या प्रयोगशाळा चाचणीमध्ये संबंधित आईस्क्रीममध्ये फॅटचे प्रमाण केवळ ७.९४ टक्के आढळले. भारतीय अन्न सुरक्षा आणि मानके प्राधिकरणाच्या (FSSAI) नियमांनुसार अस्सल आईस्क्रीममध्ये किमान १० टक्के फॅट असणे आवश्यक असल्याने हे उत्पादन निर्धारित निकषांमध्ये बसत नसल्याचे स्पष्ट झाले आहे. अन्न सुरक्षा अधिकारी तेजस्विनी व्ही. पाटील आणि आकाश चव्हाण यांनी सह-आयुक्त पी. आर. सिंगारवाड तसेच सहाय्यक आयुक्त अनुपमा बाळासाहेब पाटील यांच्या मार्गदर्शनाखाली ही कारवाई केली. जप्त करण्यात आलेल्या आईस्क्रीमचे नमुने शासकीय प्रयोगशाळेत तपासणीसाठी पाठविण्यात आले असून अंतिम अहवाल प्राप्त झाल्यानंतर पुढील कायदेशीर कारवाई करण्यात येणार असल्याचे एफडीएने स्पष्ट केले आहे. दक्षिण मुंबईतील अत्यंत लोकप्रिय असलेल्या या ब्रँडवर झालेल्या कारवाईमुळे शहरातील खाद्यपदार्थ विक्रेते आणि ग्राहकांमध्ये मोठी खळबळ उडाली आहे.
