पुणे : सततच्या मुसळधार पावसामुळे पुण्यातील ऐतिहासिक सिंहगड किल्ल्यावर शुक्रवारी सकाळी मुख्य प्रवेशद्वाराजवळील पायरी मार्गावर दरड कोसळल्याची घटना घडली. या घटनेनंतर सुरक्षेच्या दृष्टीने वन विभागाने सिंहगड किल्ला पर्यटकांसाठी तात्पुरता बंद ठेवण्याचा निर्णय घेतला आहे. गडावर जाणाऱ्या पायरी मार्गावरील पुणे दरवाजा परिसरात तीन ते चार मोठे दगड आणि मोठ्या प्रमाणात मातीचा ढिगारा कोसळल्याने मार्ग पूर्णपणे बंद झाला आहे. ही घटना मध्यरात्री किंवा पहाटेच्या सुमारास घडल्याचा प्राथमिक अंदाज असून, सकाळी नियमित पाहणीदरम्यान वन संरक्षण समितीच्या कर्मचाऱ्यांच्या निदर्शनास हा प्रकार आला. सुदैवाने दरड कोसळली तेव्हा त्या ठिकाणी कोणतीही व्यक्ती नसल्यामुळे मोठी जीवितहानी किंवा दुखापत टळली. मात्र, सतत सुरू असलेल्या पावसामुळे आणखी दरडी कोसळण्याचा धोका लक्षात घेऊन प्रशासनाने कोणताही धोका न पत्करता किल्ल्यावर पर्यटकांच्या प्रवेशावर तात्पुरती बंदी घातली आहे. मलबा हटवून मार्ग सुरक्षित झाल्यानंतरच किल्ला पुन्हा पर्यटकांसाठी खुला करण्यात येणार असल्याचे प्रशासनाने स्पष्ट केले आहे.
वन विभागाने तसेच स्थानिक प्रशासनाने नागरिक आणि पर्यटकांना विशेष सावधगिरी बाळगण्याचे आवाहन केले आहे. आठवड्याच्या सुट्टीच्या दिवशी सिंहगड तसेच आसपासच्या घाट परिसरात जाणे टाळावे, कारण मुसळधार पावसामुळे आणखी दरडी कोसळण्याची शक्यता नाकारता येत नाही. सिंहगडसह वरंधा घाट, कुसगाव खिंड मार्ग आणि भोर–महाड मार्गावरही दरडी कोसळल्याच्या घटना समोर आल्या असून, अनेक ठिकाणी वाहतुकीवर परिणाम झाला आहे. हवामान विभागाने पुणे जिल्ह्यातील घाटमाथा परिसरासाठी ‘रेड अलर्ट’ जारी केला असून, पुढील दोन दिवस नागरिकांनी अत्यंत सतर्क राहण्याच्या सूचना देण्यात आल्या आहेत. प्रशासनाकडून मलबा हटविण्याचे काम हाती घेतले जाणार असून, परिसर पूर्णपणे सुरक्षित असल्याची खात्री झाल्यानंतरच किल्ला पर्यटकांसाठी पुन्हा खुला केला जाईल. तोपर्यंत ट्रेकर्स आणि पर्यटकांनी सिंहगडावर जाण्याचा बेत पुढे ढकलावा आणि प्रशासनाच्या सूचनांचे काटेकोर पालन करावे, असे आवाहन करण्यात आले आहे.
