पुणे : रुग्णांना घराजवळील परवानाधारक औषधविक्रेत्यांकडून सहजपणे घरपोच औषधे उपलब्ध व्हावीत, यासाठी पुण्यातील उद्योजिका डॉ. दीपमाला पाटील यांनी ‘फार्माईश’ हा तंत्रज्ञानाधारित डिजिटल मंच विकसित केला आहे. स्टार्टअप इंडिया उपक्रमांतर्गत तयार करण्यात आलेला हा मंच नागरिकांना त्यांच्या घरापासून एक ते पाच किलोमीटर परिसरातील स्थानिक औषधविक्रेत्यांशी जोडणार आहे. यामुळे डॉक्टरांच्या चिठ्ठीवरील औषधे मिळविण्याची प्रक्रिया अधिक सोपी होणार असून, स्थानिक औषधविक्रेत्यांची आरोग्यसेवेतील भूमिका अधिक बळकट करण्याचा उद्देश आहे. पत्रकार परिषदेत माहिती देताना डॉ. पाटील यांनी सांगितले की, पुढील महिन्यापासून पुण्यात या सेवेची सुरुवात होणार आहे. औषध क्षेत्रातील संशोधन आणि व्यावसायिक अनुभवातून या संकल्पनेचा जन्म झाला. अनेकदा रुग्णाची काळजी घेणाऱ्या व्यक्तीला औषधे आणण्यासाठी त्याला एकटे सोडावे लागते किंवा औषधविक्रेत्यांपर्यंत पोहोचण्यात अडचणी येतात. प्रत्यक्षात औषधांची कमतरता नसून ग्राहक आणि स्थानिक औषधविक्रेते यांच्यातील डिजिटल दरी हीच मोठी समस्या असल्याचे निरीक्षणातून स्पष्ट झाले. त्यामुळे दोघांना जोडणारा समान तंत्रज्ञान मंच विकसित करण्याची कल्पना पुढे आली.
‘फार्माईश’च्या मोबाइल ॲपद्वारे ग्राहक डॉक्टरांची चिठ्ठी डिजिटल स्वरूपात जवळच्या परवानाधारक औषधविक्रेत्याकडे पाठवू शकतील. चिठ्ठी पाठविण्यासाठी विविध पर्याय उपलब्ध असल्याने सर्व वयोगटांतील नागरिकांना या सेवेचा सहज वापर करता येईल. संबंधित औषधविक्रेता चिठ्ठीची पडताळणी करून औषधांची उपलब्धता तपासेल आणि मागणी पूर्ण करण्याबाबत निर्णय घेईल. औषधांचे वितरण, देयक स्वीकारणे आणि घरपोच सेवा देण्याची संपूर्ण जबाबदारी संबंधित औषधविक्रेत्याची असेल. या सुविधेसाठी ग्राहकांकडून कोणतेही स्वतंत्र शुल्क आकारले जाणार नसल्याचे डॉ. पाटील यांनी स्पष्ट केले. ही सेवा सुरू करण्यापूर्वी ‘फार्माईश’च्या प्रतिनिधींनी ५०० हून अधिक औषधविक्रेत्यांशी संवाद साधून त्यांच्या गरजा, अपेक्षा आणि व्यवहार्यता तपासली आहे. सुरुवातीला पुण्यात सेवा सुरू केल्यानंतर टप्प्याटप्प्याने राज्यातील तसेच इतर शहरांमध्येही या डिजिटल मंचाचा विस्तार करण्यात येणार आहे. स्थानिक औषधविक्रेते आणि ग्राहक यांच्यात विश्वासाचे नाते कायम ठेवत तंत्रज्ञानाच्या माध्यमातून अधिक सुलभ, सुरक्षित आणि जलद औषध वितरण व्यवस्था उभारण्याचा ‘फार्माईश’चा प्रयत्न असल्याचेही त्यांनी सांगितले.
