मुंबई : दिवंगत उपमुख्यमंत्री अजित पवार यांच्या विमान अपघाताला आठ महिने पूर्ण झाले असतानाही या दुर्घटनेमागील कारण अद्याप स्पष्ट झालेले नसल्याचा आरोप करत शरद पवार गटाचे आमदार रोहित पवार यांनी पुन्हा एकदा सरकारवर गंभीर प्रश्न उपस्थित केले आहेत. या प्रकरणात व्हीएसआर व्हेंचर्स प्रायव्हेट लिमिटेड आणि संबंधित व्यक्तींना सत्तेचा वापर करून एक “मफलरवाला” बडा नेता वाचवत असल्याचा दावा त्यांनी केला. या नेत्याचे नाव आणि त्यासंबंधीचे पुरावे आपण १० ऑक्टोबर रोजी सकाळी १० वाजता मुंबईत आयोजित पत्रकार परिषदेत सादर करणार असल्याचे त्यांनी सांगितले. मात्र, पत्रकारांनी छगन भुजबळ आणि अरविंद केजरीवाल यांची नावे विचारल्यानंतर या दोघांचा या प्रकरणाशी कोणताही संबंध नसल्याचे त्यांनी स्पष्ट केले. त्यामुळे रोहित पवारांनी उल्लेख केलेला “मफलरवाला नेता” नेमका कोण, याबाबत राजकीय वर्तुळात चर्चेला उधाण आले आहे.
रोहित पवार यांनी सांगितले की, २८ जानेवारी २०२६ रोजी बारामती विमानतळावर उतरताना अजित पवार यांचे बॉम्बार्डियर लिअरजेट-४५ चार्टर विमान अपघातग्रस्त झाले होते. या दुर्घटनेत अजित पवार यांच्यासह विमानातील पाचही जणांचा मृत्यू झाला. हे विमान व्हीएसआर व्हेंचर्स प्रायव्हेट लिमिटेडचे असून, कंपनीचे संचालक विजय कुमार सिंग आणि रोहित सिंग यांच्यावर गंभीर प्रश्न उपस्थित करण्यात आले आहेत. हा केवळ अपघात नसून घातपात असू शकतो, असा संशय आपण सुरुवातीपासून व्यक्त करत असल्याचे त्यांनी सांगितले. आठ महिने उलटूनही सरकार आणि सीआयडीकडून अपेक्षित तपास झालेला नसल्याचा आरोप करत त्यांनी तपासात जाणीवपूर्वक विलंब होत असल्याचे म्हटले. ब्लॅक बॉक्स जळाल्याचे भासवून प्रकरण दडपण्याचा प्रयत्न झाला, मात्र ब्लॅक बॉक्स सुरक्षित असल्याचे पुरावे आमच्याकडे असल्याचा दावाही त्यांनी केला. रोहित पवार म्हणाले, “अजितदादा गेल्यापासून आठ महिने झाले, पण सरकार हातावर हात ठेवून बसले आहे. लोक हा विषय विसरले आहेत, असे सरकारला वाटत असेल; मात्र शेतकरी, मजूर आणि सामान्य नागरिक अजितदादांना विसरलेले नाहीत. ते असते तर दुष्काळासारख्या संकटात मदतीसाठी प्रशासनाला तातडीने निर्णय घ्यायला भाग पाडले असते.” त्यांनी पुढे सांगितले की, काही प्रभावशाली लोक या प्रकरणातील सत्य बाहेर येऊ नये म्हणून प्रयत्न करत आहेत. १० ऑक्टोबरच्या पत्रकार परिषदेत व्हीएसआर कंपनीचे व्यवहार, त्यांना मदत करणाऱ्या व्यक्ती, त्यांचे राजकीय संबंध आणि संबंधित पुरावे सादर केले जातील. हे सादरीकरण पूर्णपणे तांत्रिक नसून अनेक महत्त्वाचे मुद्दे त्यात मांडले जातील. अधिकृत एएआयबी अहवाल आल्यानंतर तांत्रिक विश्लेषणही स्वतंत्रपणे मांडणार असल्याचे त्यांनी स्पष्ट केले. दरम्यान, दिवंगत अजित पवार यांच्या निधनाला आठ महिने पूर्ण झाल्याच्या पार्श्वभूमीवर उपमुख्यमंत्री सुनेत्रा पवार यांनी बारामती येथील विद्या प्रतिष्ठान परिसरातील स्मृतिस्थळी जाऊन पुष्प अर्पण करत त्यांना भावपूर्ण श्रद्धांजली वाहिली. दुसरीकडे, रोहित पवार यांच्या पत्रकार परिषदेची तारीख वारंवार पुढे ढकलली जात असल्याने त्याबाबतही राजकीय चर्चांना उधाण आले आहे. सुरुवातीला ४ सप्टेंबर, त्यानंतर २८ सप्टेंबर आणि आता १० ऑक्टोबर अशी तारीख बदलण्यात आल्याने या खुलाशांबाबत उत्सुकता अधिक वाढली आहे.
