पुणे : इंदापूरातील बस स्थानकासमोरून अवैधरीत्या दारूची वाहतूक करणाऱ्या वाहनावर इंदापूर पोलिसांनी कारवाई केली असून या कारवाईत वाहनासह तब्बल ५ लाख ५० हजार ४५० रुपयांचा मुद्देमाल जप्त करण्यात आला असून आगामी स्थानिक स्वराज्य संस्थांच्या निवडणुकांच्या पार्श्वभूमीवर ही कारवाई विशेष महत्त्वाची मानली जात आहे. याप्रकरणी दोघांविरोधात गुन्हा दाखल करून ताब्यात घेतले आहे. ओंकार दत्तात्रेय मेठे (वय २२ रा.उजनी, ता. माढा जि. सोलापूर), प्रसाद बाळासाहेब उबाळे (वय २४ रा. रांजणी, ता. माढा, जि. सोलापूर) असे ताब्यात घेण्यात आलेल्यांची नावे आहेत.
सदरची कामगिरी ही पुणे ग्रामीणचे पोलीस अधीक्षक संदीपसिंह गिल, अप्पर पोलीस अधीक्षक गणेश बिरादार, उपविभागीय पोलीस अधिकारी डॉ. सुदर्शन राठोड यांच्या मार्गदर्शनाखाली इंदापूर पोलीस ठाण्याचे पोलिस निरीक्षक विलास नाळे, गुन्हे शोध पथकाचे उपनिरीक्षक अजित बिरादार, पोलिस अंमलदार सलमान खान, तुषार चव्हाण, सूरज गुंजाळ, गणेश डेरे, विनोद लोखंडे, अंकुश माने, योगेश करचे यांनी केली.
