मुंबई : ठाण्यातील वागळे औद्योगिक वसाहतीजवळ बोअरवेल खणताना मुंबई पालिकेच्या जलबोगद्याला भगदाड पडल्याची घटना काही महिन्यांपूर्वी घडली होती. एका बांधकाम व्यावसायिकाकडून होणाऱ्या या कामामुळे मुंबईला होणाऱ्या पाणीपुरवठ्यात एक महिन्यासाठी कपात करावी लागली होती. पाण्याची झालेली नासाडी आणि दंड, तसेच जलबोगद्याच्या दुरुस्ती खर्चापोटीचा एकूण ७५ कोटी रुपये बांधकाम व्यावसायिकाकडून वसूल करण्यासाठी मुंबई महापालिकेने एमआयडीसीला तसेच बांधकाम व्यावसायिकाला दोनवेळा पत्र पाठवूनही दंड प्राप्त झालेला नाही. नुसत्या पत्रव्यवहारानंतर मात्र मुंबई महापालिकेची दंडवसुलीची प्रक्रिया पूर्णपणे थंडावली आहे.
भांडुप संकुल येथील जलशुद्धीकरण केंद्राला ७५ टक्के पाणीपुरवठा हा गुंदवली ते भांडुप संकुलदरम्यानच्या ५,५०० मिलीमीटर व्यासाच्या १५ किलोमीटर जलबोगद्याद्वारे होतो. एका बांधकाम व्यावसायिकाने ठाणे वागळे औद्योगिक क्षेत्र येथे बेकायदा बोअरवेल (कूपनलिका) खणली. खोदकाम सुरू असताना या जलबोगद्यास हानी पोहोचून पाणी गळती सुरू झाली होती. दुरुस्तीसाठी जलबोगदा ३१ मार्च २०२३ पासून बंद केला होता. त्यामुळे मुंबई महापालिकेने ३१ मार्च २०२३ पासून एक महिन्यासाठी १५ टक्के कपात जाहीर केली होती. कपातीनंतर मुंबईतील बहुतांश भागात पाण्याची समस्या निर्माण झाली. जलबोगदा दुरुस्ती करून २३ एप्रिलपासून पाणीपुरवठा सुरळीत करण्यात आला.
या घटनेवेळी वाहणारे पाणी दोन पाइपलाइनने पंपाद्वारे ड्रेनेजमध्ये सोडले जात असल्याचेही मुंबई महापालिकेच्या जलअभियंता विभागाच्या निदर्शनास आले. मार्च महिन्याच्या आधी पाच महिन्यांपेक्षाही जास्त काळापासून हा प्रकार होत होता. त्यामुळे लाखो लिटर पाणी वाया गेले. एमआयडीसी हद्दीत ही घटना घडली होती. पाच ते सहा महिन्यांत पाण्याची झालेली नासाडी आणि दंड असे एकूण ७५ कोटी रुपये वसूल करावे, असे पत्र मुंबई पालिकेने गेल्या मार्च महिन्यात एमआयडीसीला दिले. तर बांधकाम व्यावसायिकालाही पत्र पाठवण्यात आले. एमआयडीसी आणि बांधकाम व्यावसायिकाशी दोन वेळा पत्रव्यवहार करूनही दंड प्राप्त झाला नसल्याची माहिती जलअभियंता विभागातील एका वरिष्ठ अधिकाऱ्याने दिली. या प्रकरणात मार्च २०२३ मध्ये माहिती अधिकार कार्यकर्ते भरत कुमार पिसाट यांना माहिती मिळताच त्यांनी प्रत्यक्ष घटनास्थळी जाऊन पाहणी केली होती आणि पाण्याची नासाडी होत असल्याचे निदर्शनास आले होते. त्यानंतर बांधकाम व्यावसायिकाविरोधात ठाण्यातील श्रीनगर पोलिस ठाण्यात तक्रार दाखल केली. माहिती अधिकारांतर्गंत मुंबई महापालिकेकडूनही या प्रकरणाशी संबंधित आणखी काही माहिती गोळा करत असल्याचे भरतकुमार यांनी सांगितले. मुंबईसह ठाण्याला पुरवठा करणाऱ्या पाण्याचीही नासाडी झाली आहे. त्यामुळे संपूर्ण माहिती प्राप्त होताच याविरोधात न्यायालयात याचिका दाखल करून दंडात्मक कारवाईची मागणीही केली जाणार असल्याचे सांगितले.
