मुंबई : मुंबई लोकलने प्रवास करणाऱ्या महिला प्रवाशांसाठी रेल्वे स्थानकांवर ‘वूमेन पावडर रूम’ अर्थात, सौंदर्य प्रसाधनगृह उभारण्याचा निर्णय मध्य रेल्वेने घेतला आहे. येत्या दोन महिन्यांत महिला प्रवाशांसाठी सौंदर्य प्रसाधनगृहाची ही सुविधा सुरू होणार आहे.
मध्य रेल्वेच्या मुंबई विभागातील लोकमान्य टिळक टर्मिनस (फलाट क्रमांक एक जवळ), कांजूरमार्ग (फलाट क्रमांक वन-ए), मुलुंड (पश्चिम), मानखुर्द (फलाट क्रमांक एक), चेंबूर (फलाट क्रमांक एक) घाटकोपर (फलाट क्रमांक एक) आणि ठाणे (फलाट क्रमांक दोन) या सात स्थानकांत ही सौंदर्य प्रसाधनगृहे उभारण्यात येणार आहेत. दर्जेदार स्वच्छतागृहांसह सौंदर्य साहित्यांचे विक्री दालन, कॉफीशॉप, शिशुंच्या स्तनपानासह डायपर बदलण्यासाठी स्वतंत्र जागा या सुविधादेखील महिलांना एकाच छताखाली उपलब्ध होणार आहे. मोफत वायफाय, सुरक्षेसाठी सीसीटीव्ही आणि शहरातील अन्य सौंदर्य प्रसाधनगृहांचा शोध घेण्यासाठी ॲप अशा सुविधा महिला प्रवाशांना उपलब्ध होणार आहेत. स्थानकातील प्रवासी वर्दळीला अडथळा निर्माण होणार नाही अशा ठिकाणी प्रत्येक स्थानकांवर २०० चौरस फुटांची जागा यासाठी संबंधितांना देण्यात आली आहे. सौंदर्य प्रसाधनगृहांसाठी पाच वर्षांचा करार करण्यात आला आहे. संबंधित कंत्राटदाराला कार्यादेश देण्यात आला आहे. दोन महिन्यांच्या आत सौंदर्य प्रसाधनगृह उभारणे बंधनकारक आहे, असे रेल्वे अधिकाऱ्यांनी सांगितले.
महिलांसाठी असलेल्या बहुतांश सार्वजनिक स्वच्छतागृहे अस्वच्छ असल्याने ४८ टक्के महिला असमाधानी आहेत. यामुळे महिलांना स्वच्छ आणि सुरक्षित वातावरणातील स्वच्छतागृह उपलब्ध व्हावे यासाठी आधुनिक स्वच्छतागृह तयार करण्यात येत आहेत. घाटकोपर मेट्रो स्थानकात सौंदर्य प्रसाधनगृहे वापरात असून महिला प्रवाशांकडून या उपक्रमाबाबत समाधान व्यक्त होत आहे, असे रेल्वे अधिकाऱ्यांनी म्हटले आहे.
