ठाणे : ठाणेकरांसाठी आनंदाची बातमी समोर आली असून येत्या काही दिवसांत ठाणे महापालिकेच्या परिवहन सेवेत मोठा बदल पाहायला मिळणार आहे. प्रवाशांचा प्रवास अधिक आरामदायी आणि सुरक्षित करण्यासाठी नव्या बस ताफ्याची भर पडणार आहे. परिवहन विभागाच्या माहितीनुसार दिवाळीपर्यंत एकूण २१० नवीन बस सेवेत दाखल होणार आहेत. यामध्ये १०० सीएनजी बस, १०० इलेक्ट्रिक बस आणि १० डबल डेकर बसांचा समावेश असेल. विशेष म्हणजे ठाणेकरांना डबल डेकर बसचा अनुभव पुन्हा घेता येणार असून पहिली डबल डेकर बस मे महिन्याच्या पहिल्या आठवड्यात रस्त्यावर धावणार आहे. तसेच इलेक्ट्रिक बस टप्प्याटप्प्याने सेवेत येणार असून पहिल्या टप्प्यात जून महिन्यात २५ बस सुरू होतील, तर उर्वरित बस पुढील महिन्यांत दाखल होतील.
सध्या ठाणे परिवहनच्या ताफ्यात ३६० बस असून त्या मुंबई, बोरीवली, भिवंडी आणि इतर मार्गांवर धावत आहेत. यापैकी १२३ बसेस वातानुकूलित इलेक्ट्रिक आहेत आणि रोज सुमारे २ लाख ३० हजार प्रवासी प्रवास करतात. केंद्र सरकारच्या १५व्या वित्त आयोगाच्या माध्यमातून पर्यावरण संतुलन राखण्यासाठी इलेक्ट्रिक बस उपलब्ध करून देण्यात आल्या आहेत. नव्या बसांमुळे प्रवाशांना अधिक सोयीस्कर प्रवास करता येणार असून गर्दी कमी होण्यास मदत होईल. तसेच डबल डेकर बसमुळे शहराच्या रस्त्यांवर वेगळा अनुभव पुन्हा पाहायला मिळणार आहे, अशी माहिती परिवहन विभागाने दिली.
