पिंपरी : पुणे जिल्ह्यात सुरू असलेल्या मुसळधार पावसामुळे अनेक भागांत पूरस्थिती, भूस्खलन आणि जलमय परिस्थिती निर्माण झाली असून नागरिकांचे जनजीवन विस्कळीत झाले आहे. अनेक गावांना आणि वसाहतींना पाण्याचा वेढा पडल्याने बचाव आणि मदतकार्य युद्धपातळीवर सुरू आहे. अशा कठीण परिस्थितीत पुणे महानगर प्रदेश विकास प्राधिकरण (पीएमआरडीए) आणि पुणे महानगर आपत्ती प्रतिसाद पथकाने गेल्या २४ तासांत राबविलेल्या धडक मोहिमेत शेकडो नागरिकांना सुरक्षितस्थळी हलविण्यात यश मिळवले आहे. अतिवृष्टीचा सर्वाधिक फटका मावळ आणि लोणावळा परिसराला बसला आहे. लोणावळ्यातील ‘ग्रीन लँड व्हिला’ येथे पुराच्या पाण्यात अडकलेल्या दोन ज्येष्ठ नागरिकांची बचाव पथकाने सुरक्षित सुटका केली. तसेच कार्ले येथील ‘माऊंट वेस्ट क्रिस्टा सोसायटी’मध्ये पुराचे पाणी शिरल्याने अडकलेल्या २१ नागरिकांना लाइफ जॅकेट, लाइफ रिंग आणि दोरांच्या सहाय्याने सुखरूप बाहेर काढण्यात आले. याशिवाय इंडियन ऑईल पेट्रोल पंप परिसरातून तीन नागरिकांची, तर मळवली येथील ‘सूर्य व्हिला’ परिसरातून २० नागरिकांसह एका पाळीव कुत्र्याचीही सुरक्षित सुटका करण्यात आली. मळवली-बोरज रस्त्यावरील अंकित ग्रुप सोसायटीतील १५ रहिवासी तसेच वाकसाई येथील वालोसिटी, मँगो आणि ओरिकल व्हिला परिसरातील ३४ नागरिकांनाही बचाव पथकाने सुरक्षितस्थळी हलवले.
लोहगावमधील आदर्श नगर परिसरात रस्त्यावर मोठ्या प्रमाणावर पाणी साचल्याने एक प्रवासी बस अडकली होती. या बसमधील १० ते १२ प्रवाशांची बचाव पथकाने तातडीने सुखरूप सुटका करून सुरक्षितस्थळी हलविले. दरम्यान, खेड तालुक्यातील रेटवडी येथे पाण्यात बुडालेल्या एका व्यक्तीचा शोध घेण्यासाठी विशेष पथक तैनात करण्यात आले असून शोधमोहीम सुरू आहे. तसेच शेलू येथे पाण्यात बुडालेल्या एका व्यक्तीचा मृतदेह बाहेर काढण्यात आला आहे. दुसरीकडे, लोणावळ्यातील ‘नॉर्थ पॉईंट’ आणि ‘श्री सिक्स्टी रिसॉर्ट’ परिसरात दरड कोसळल्याच्या घटना घडल्या असून ढिगाऱ्याखाली काही नागरिक अडकल्याची भीती व्यक्त करण्यात येत आहे. या ठिकाणी शोध आणि बचाव कार्य युद्धपातळीवर सुरू असून आपत्ती प्रतिसाद पथक, स्थानिक प्रशासन आणि संबंधित यंत्रणा सतत परिस्थितीवर लक्ष ठेवून आहेत. प्रशासनाने नागरिकांना अनावश्यक प्रवास टाळण्याचे, नदी-नाले आणि डोंगराळ भागांपासून दूर राहण्याचे तसेच स्थानिक प्रशासनाच्या सूचनांचे पालन करण्याचे आवाहन केले आहे.
