नवी मुंबई : परदेशातील कंपनीत नोकरी मिळवून देण्याच्या बहाण्याने एका सायबर टोळीने वाशी सेक्टर १७ मध्ये राहणाऱ्या एका व्यक्तीला वेगवेगळ्या कारणांसाठी पैसे भरण्यास सांगून त्यांच्याकडून ११ लाख १० हजार रुपये उकळून त्याची फसवणूक केल्याचा प्रकार उघडकीस आला आहे. वाशी पोलिसांनी या प्रकरणातील अज्ञात सायबर टोळीविरोधात फसवणुकीसह अपहार तसेच आयटी ॲक्टनुसार गुन्हा दाखल करून त्यांचा शोध सुरू केला आहे. वाशीतील या व्यक्तीला परदेशीतील नोकरीची गरज असल्याने तिने विविध ठिकाणी अर्ज केले होते. त्यानंतर जानेवारी महिन्यामध्ये या व्यक्तीच्या मोबाइलवर मायकल जोसेफ नावाच्या सायबरचोराने संपर्क साधून सिंगापूर व इतर ठिकाणी नोकरी मिळवून देण्याचा बहाणा करून ६१५० रुपये भरण्यास सांगितले. त्यानुसार, या व्यक्तीने ग्रॉस कॅरीअर.कॉम या वेबसाइटवर ही रक्कम पाठवून दिल्यानंतर दुसऱ्या सायबरचोराने त्यांना परदेशातील नोकरीचे त्यांचे पक्के झाल्याचे सांगितले.
तसेच, पुढील एक राऊंड बाकी असल्याचे व त्यासाठी त्याला रक्कम भरावी लागेल, असे सांगून ही रक्कम परत मिळेल, असे सांगण्यात आले. त्यामुळे या व्यक्तीने सायबरचोर सांगतील, त्यानुसार १२ ते १६ जानेवारी या कालावधीत तब्बल ११ लाख १० हजार रुपये पाठवून दिले. त्यानंतर त्या व्यक्तीला आणखी एक लाख ३० हजार रुपये भरण्यास सांगण्यात आले. मात्र ही रक्कम भरू शकत नसल्याचे सांगून आधीची रक्कम परत करण्यास सांगितले असता, त्यासाठी ३० दिवस लागतील, असे सांगितले. मात्र त्या दिवसापासून आजतागायत या सायबर चोरांनी पैसे दिले नाहीत. अखेर फसवणूक झाल्याचे लक्षात आल्यानंतर त्यांनी पोलिस ठाण्यात धाव घेतली.
