मुंबई : प्रभादेवी येथील प्रसिद्ध श्री सिद्धिविनायक मंदिर येथे येणाऱ्या भाविकांसाठी BEST प्रशासनाने २३ मे २०२६ पासून नवीन वातानुकूलित वर्तुळाकार बस सेवा सुरू केली आहे. ‘ए-८१४ श्री सिद्धीविनायक फेरी’ या नावाने सुरू करण्यात आलेली ही विशेष बस सेवा दादर रेल्वे स्थानक (पश्चिम) ते मंदिरादरम्यान धावणार आहे. या उपक्रमामुळे भाविकांचा प्रवास अधिक आरामदायी, सुरक्षित आणि कमी खर्चिक होणार आहे. बसचा मार्ग दादर स्टेशन (पश्चिम), डॉ. अँटोनियो दा सिल्वा हायस्कूल, पोर्तुगीज चर्च मार्गे सिद्धिविनायक मंदिर असा आहे. परतीच्या प्रवासात रवींद्र नाट्य मंदिर, दादर पोलीस स्टेशन, शारदा आश्रम, कबुतरखाना मार्गे बस पुन्हा दादर स्टेशनला पोहोचेल. सकाळी ७ वाजल्यापासून रात्री ८:५५ पर्यंत ही सेवा उपलब्ध असून दर २० ते २२ मिनिटांनी बस धावणार आहे.
या नवीन AC बस सेवेचा सर्वाधिक फायदा ज्येष्ठ नागरिक, महिला आणि लहान मुलांना होणार आहे. आतापर्यंत दादरहून मंदिरात जाण्यासाठी भाविकांना टॅक्सी किंवा खासगी वाहनांवर अवलंबून राहावे लागत होते. मात्र आता केवळ ₹१२ मध्ये थेट प्रवासाची सुविधा उपलब्ध झाली आहे. ५ ते १२ वर्षे वयोगटातील मुलांसाठी अर्धे तिकीट म्हणजेच ₹६ आकारले जाणार आहे. विशेषतः मंगळवार, अंगारकी चतुर्थी आणि वीकेंडला मंदिर परिसरात होणारी प्रचंड गर्दी आणि वाहतूक कोंडी लक्षात घेऊन BESTने ही सेवा सुरू केली आहे. प्रवासी बसमध्ये कंडक्टरकडून रोख रक्कम देऊन तिकीट घेऊ शकतात किंवा Chalo तसेच चलो स्मार्ट कार्डद्वारे डिजिटल पद्धतीने तिकीट बुक करू शकतात.
