बारामती : आपल्या आजूबाजूला फसवणुकीचे अनेक प्रकार समोर येत आहेत. त्यात ऑनलाईन फसवणुकीच्या प्रकारामध्ये दिवसेंदिवस वाढ होताना पहायला मिळत आहे. त्यातच बारामतीमधून असाच फसवणुकीचा धक्कादायक प्रकार उघडकीस आला आहे. जर्नलमध्ये प्रसिद्धी देतो असे सांगत २० लाख ५ हजार रुपये स्विकारत फसवणूक केल्याप्रकरणी बिहारमधील दोघांविरोधात बारामती शहर पोलीस ठाण्यात गुन्हा दाखल करण्यात आला आहे. मिळालेल्या माहितीनुसार, मुळचे बारामतीत राहणारे परंतु सध्या दक्षिण कोरियात असणाऱ्या अमोल श्रीकृष्ण साळुंखे यांची या प्रकरणात फसवणूक झाली. या घटनेने बारामतीत तालुक्यात एकच खळबळ उडाली आहे. मिनी कुमारी रविशंकर सिंग आणि चेतन पल्लव (रा. मुंगेरी गंज, बेगुसराई, बिहार) अशी गुन्हा दाखल झालेल्यांची नावे आहेत. साळुंखे (रा. तपोवन काॅलनी, बारामती, सध्या रा. दक्षिण कोरिया) यांची फसवणूक झाली आहे. २२ मार्च २०२२ ते २ ऑक्टोबर २०२२ या कालावधीत ही घटना घडली. श्रीकृष्ण साळुंखे हे एप्रिल २०२२ पासून दक्षिण कोरिया मध्ये पी.एच.डी. शिक्षण घेत आहे.
युनिवर्सिटी आणि इनडीव्हीज्युअल क्लायंटकडून रिसर्च पेपर गोळा करून चांगल्या जर्नलमध्ये प्रकाशित करण्याचे काम करतात. रिसर्च पेपर जर्नलमध्ये प्रकाशित करण्यासाठी साळुंखे आणि वरील आरोपींचा संपर्क आला. यातूनच त्यांची फसवणूक झाली. आरोपींनी साळुंखे यांना युरेशियन केमिकल कम्युनिकेशन जर्नल, सॉलिड टेस्ट फीना फिनालेना जर्नल, जर्नल आणि वर्ड अकॅडमी सायन्स जर्नलमध्ये तुमचे शोधनिबंध प्रसिद्ध होतील, असा विश्वास दिला. त्यापोटी फिर्यादीने त्यांना बारामतीतील त्यांच्या दोन बॅंकेतील खात्यांवरून २० लाख ५ हजारांची रक्कम पाठवली. परंतु कोणत्याही जर्नलमध्ये त्यांना प्रसिद्धी दिली गेली नाही. त्यांचा विश्वासघात करून संगनमताने फसवणूक केली गेली. त्यामुळे पैसे देताना किंवा ऑनलाईन पाठवताना शहानिशा कराव्यात, असे आवाहन पोलिसांकडून करण्यात आले आहे.
