वृत्तसंस्था : चार अंतिम लढती, चार विजेतेपदे. चिराग शेट्टी आणि सात्त्विकसाईराज रांकीरेड्डी यांची आंतरराष्ट्रीय बॅडमिंटन स्पर्धातील यंदाची ही कामगिरी आहे. त्यांनी विजेतेपदाची लढत जिंकण्याची यशोमालिका कायम ठेऊन कोरिया ओपन सुपर ५०० बॅडमिंटन स्पर्धेतील पुरुष दुहेरीचे विजेतेपद जिंकले. त्यांनी जागतिक क्रमवारीत अव्वल असलेल्या इंडोनेशियाच्या जोडीविरुद्ध पहिला गेम गमावला; पण त्यानंतर यशस्वी प्रतिकार करून अंतिम सामना; तसेच विजेतेपद जिंकले. चिराग-सात्त्विकने निर्णायक लढतीत अव्वल मानांकित फाजर अल्फियान आणि मोहम्मद रियान आर्दिआंतो यांचा १७-२१, २१-१३, २१-१४ असा ६२ मिनिटांत पराभव केला. भारतीयांनी सलग दुसऱ्या लढतीत इंडोनेशियाच्या जोडीस त्यांच्या घरच्या कोर्टवर पराभूत केले. या वेळी वर्षातील चौथे विजेतेपद जिंकताना या यशाची पुनरावृत्ती केली. पहिला गेम १९ मिनिटांत गमावणाऱ्या भारतीयांनी पुढील दोन गेम २२ आणि २१ मिनिटांत जिंकले.
भारतीय जोडीने आपण कोणतीही दयामाया दाखवत नाही हेच या सामन्यात अधोरेखीत पहिल्या गेमच्या अंतिम टप्प्यात सहा गुणांची पिछाडी असताना कोणीही आपली ताकद पुढील गेमसाठी राखून ठेवली असती; पण भारतीयांनी या परिस्थितीतही प्रत्येक शटल परतवण्यासाठी कसोशीने प्रयत्न केला. दुसऱ्या गेमपासून काय होणार याची नोटीसच जणू भारतीयांनी दिली होती. त्यांनी आम्ही कोणत्याही परिस्थितीत लढण्यास तयार असतो हाच इशारा दिला. त्यामुळे गेम गमावला असला तरी मानसिक लढाई जिंकली होती. दुसऱ्या गेममध्ये सुरुवातीस आघाडी घेतल्यावर भारतीयांनी प्रतिस्पर्धी कोर्टच्या मागील बाजूस जास्तीत जास्त कसे राहतील याकडे लक्ष दिले. भारतीय जास्त आक्रमक होते. त्यातही चिराग जास्त होता. तो तसेच सात्त्विक शरीरवेधी स्मॅश करताना कुचराई करीत नव्हते. निर्णायक गेममध्ये प्रतिस्पर्धी जास्त जोषात आल्यावरही ते डगमगले नाहीत. भारतीय जोडीची संयमीत आक्रमकता अखेर निर्णायक ठरली. अंतिम सामन्यात भारतीयांचा जम बसण्यास वेळ लागला. त्यातच त्यांच्याकडून चुकाही झाल्या. त्यामुळे त्यांना पहिल्या गेममध्ये विश्रांतीस ४-११ अशा पिछाडीस सामोरे जावे लागले होते. मात्र, त्यांनी त्यानंतर कडवा प्रतिकार सुरू केला. विश्रांतीनंतर त्यांनी सलग सहा गुण जिंकले. त्यांची पिछाडी १४-१९ अशी कमी झाली. त्यांनी एक गेम पॉइंट वाचवला; पण त्यांना गेम जिंकण्यात अपयश आले. त्यांनी या स्पर्धेत पहिल्यांदाच गेम गमावला होता. दुसऱ्या गेममध्ये कडवी चुरस होती. भारतीयांनी सुरुवातीपासून छोटीशी आघाडी राखली होती. विश्रांतीसही ते तीन गुणांनी आघाडीवर होते. चिराग आणि सात्त्विक एकमेकांना पूरक खेळ करीत होते. विजयी फटका मारण्याची एकही संधी सोडत नव्हती. आपली लय प्रतिस्पर्धी तोडणार नाही, याची त्यांनी काळजी घेतली आणि दुसरा गेम आठ गुणांच्या फरकाने सहज जिंकला. निर्णायक गेममध्ये भारतीय जास्त आक्रमक झाले. ते धोका पत्करत होते. त्यामुळे त्यांनी विश्रांतीस पुन्हा तीन गुणांची आघाडी घेतली. इंडोनेशियाची जोडी सहज हार मानणार नव्हती. त्यांनी भारतीयांना मोठी आघाडी घेण्यापासून रोखले. मात्र भारतीयांनी याचे दडपण घेतले नाही. त्यांनी हळूहळू आघाडी वाढवतच नेली. मोक्याच्यावेळी गुण जिंकत त्यांनी १८-१२ आघाडी घेतली. त्यानंतर इंडोनेशियाच्या जोडीस दोनच गुण जिंकता आले.
कोरिया ओपनमध्ये दुसऱ्याच दिवसापासून भारतीयांच्या विजेतेपदाच्या आशा चिराग-सात्त्विक जोडीवर होत्या. या स्पर्धेत एकूण ११ भारतीय खेळाडूंचा एकेरीत सहभाग होता. त्यातील पी. व्ही. सिंधूसह नऊ खेळाडू पहिल्याच फेरीत पराभूत झाले. तर अन्य दोघे दुसऱ्या फेरीत. चिराग-सात्त्विक सोडल्यास दुहेरीतही फारसे आव्हान निर्माण करता आले नव्हते. चिराग-सात्त्विकने विजेतेपद जिंकल्यानंतर कोर्टवर खास गँगनम स्टाइलने नृत्य करून चाहत्यांना जास्तच खूष केले. त्यांनी सामना सपल्यावर लागलेल्या गाण्यावर हे नृत्य सुरू केल्यावर जिन्नाम स्टेडियममधील जल्लोष जास्तच वाढला. त्यात असंख्य चाहतेही सहभागी झाले. अंतिम फेरीत मनासारखी सुरुवात झाली नाही. मात्र, त्यानंतर खेळ उंचावला. दुसऱ्या गेममध्ये गवसल कायम राखली. इंडोनेशियन ओपनपाठोपाठ ही स्पर्धा जिंकल्याचा नक्कीच खूप आनंद आहे. आपण सर्वांनी दिलेली साथ खूपच मोलाची आहे. आम्ही खूप सुरेख खेळ केला. अंतिम सामन्यातील कामगिरी जास्त आनंद देणारी आहे. हीच विजयी वाटचाल जपान ओपनमध्येही कायम ठेवण्याचे लक्ष्य आहे. आता भरपूर विश्रांती घेणार आणि नव्या मोहिमेसाठी तयार होणार.
