मुंबई : लाडक्या बाप्पाच्या दर्शनासाठी दरवर्षीप्रमाणे यंदाही लाखो भाविक मुंबईत दाखल होत असताना गणेशोत्सवावर दुःखाचे सावट पसरवणाऱ्या दोन वेगवेगळ्या घटना समोर आल्या आहेत. पहिल्या घटनेत लालबागच्या राजाच्या दर्शनासाठी रांगेत उभ्या असलेल्या एका उच्चशिक्षित तरुणाचा अचानक हृदयविकाराच्या झटक्याने मृत्यू झाला, तर दुसऱ्या घटनेत दक्षिण मुंबईतील काळाचौकीचा महागणपती मंडप परिसरात विजेचा धक्का लागून एका ८ वर्षीय चिमुरडीचा उपचारादरम्यान मृत्यू झाला. जळगावचा रहिवासी आणि नोकरीनिमित्त पुण्यात स्थायिक झालेला जयदीप मेघराज नेमाडे हा १७ सप्टेंबर रोजी मित्रांसह लालबागच्या राजाच्या दर्शनासाठी मुंबईत आला होता.
दर्शनाच्या रांगेत उभा असताना त्याला अचानक छातीत तीव्र वेदना आणि श्वास घेण्यास त्रास होऊ लागला. मित्रांनी तत्काळ त्याला रांगेतून बाहेर काढले. बंदोबस्तावरील पोलिसांनी तातडीने मदत केंद्रात नेऊन रुग्णवाहिकेद्वारे रुग्णालयात हलवले, मात्र डॉक्टरांनी उपचारापूर्वीच त्याला मृत घोषित केले. प्राथमिक वैद्यकीय तपासानुसार ही घटना चेंगराचेंगरीमुळे नव्हे, तर अचानक आलेल्या तीव्र हृदयविकाराच्या झटक्यामुळे घडल्याचे स्पष्ट झाले आहे. जयदीप हा मेकॅनिकल इंजिनिअर असून त्याने पदव्युत्तर व्यवस्थापनाचे शिक्षण पूर्ण केले होते आणि पुण्यातील एका नामांकित कंपनीत नोकरी करत होता. जळगावमधील नेमाडे ट्रान्सपोर्टचे संचालक मेघराज नेमाडे यांचा तो एकुलता एक मुलगा होता. सुमारे १२ वर्षांपूर्वी त्याच्या आईचे निधन झाले होते. १९ सप्टेंबर रोजी जळगाव येथे त्याच्यावर शोकाकुल वातावरणात अंत्यसंस्कार करण्यात आले. दरम्यान, काळाचौकीचा महागणपती मंडप परिसरात शनिवारी मध्यरात्री सुमारे २ वाजण्याच्या सुमारास अचानक विजेचा प्रवाह उतरल्याने दर्शनासाठी आलेल्या भाविकांमध्ये एकच गोंधळ उडाला. या दुर्घटनेत एकूण ५ जण गंभीर जखमी झाले असून त्यामध्ये २ मुले आणि ३ मुलींचा समावेश आहे. सर्व जखमी ८ ते २० वर्षे वयोगटातील असून त्यांना तातडीने भायखळा येथील मसीना रुग्णालयात दाखल करण्यात आले. त्यापैकी ३ जणांवर अतिदक्षता विभागात उपचार सुरू आहेत. प्रकृती अत्यंत गंभीर झालेल्या ८ वर्षीय चिमुरडीला पुढील उपचारासाठी परळ येथील ग्लोबल रुग्णालयात हलवण्यात आले होते, मात्र उपचारादरम्यान तिचा मृत्यू झाला. विजेचा प्रवाह नेमका कसा आणि कुठून आला, याचा पोलीस आणि वीज वितरण कंपनीकडून सखोल तपास सुरू आहे. यंदाच्या गणेशोत्सवात यापूर्वीही २२ ऑगस्ट रोजी भुलेश्वरच्या राजाच्या आगमनावेळी मूर्तीचा तोल जाऊन झालेल्या दुर्घटनेत ३३ वर्षीय संकेत नेवशे आणि ३० वर्षीय ब्रिजेश हेमंत जोशी या दोन कार्यकर्त्यांचा मृत्यू झाला होता. लालबाग, काळाचौकी आणि भुलेश्वर येथील या सलग घटनांमुळे यंदाच्या गणेशोत्सवाच्या उत्साहावर दुःखाची छाया पसरली असून भाविकांमध्ये हळहळ व्यक्त केली जात आहे.
