पुणे : पुण्याची ओळख बनलेला ‘MH-12’ हा वाहन नोंदणी क्रमांक कायम ठेवण्यासाठी पुणे प्रादेशिक परिवहन कार्यालयाने (आरटीओ) देशात पहिल्यांदाच एक नवा पर्याय सुचवला आहे. पुण्यात वाहनांची संख्या विक्रमी वेगाने वाढत असल्याने ‘MH-12’ अंतर्गत उपलब्ध असलेल्या दोन अक्षरी मालिकेतील ‘AA’ ते ‘ZZ’ या सर्व सिरीज जवळपास संपल्या असून, सध्या सुरू असलेली शेवटची ‘ZZ’ मालिका येत्या १० ते १५ दिवसांत पूर्ण होण्याची शक्यता आहे. त्यामुळे नवीन वाहनांना कोणता नोंदणी क्रमांक दिला जाणार आणि पुण्याची ‘MH-12’ ही ओळख कायम राहणार का, याबाबत चर्चा सुरू झाली होती. ‘ZZ’ मालिका संपल्यानंतर पुण्याला ‘MH-61’ हा नवीन प्रादेशिक कोड देण्याची शक्यता व्यक्त केली जात होती. मात्र, त्यामुळे अनेक दशकांपासून पुण्याच्या नावाशी जोडलेली ‘MH-12’ ही ओळख बदलली असती. ही परिस्थिती लक्षात घेऊन पुणे आरटीओने विद्यमान कायद्यातील मर्यादा लक्षात ठेवत पर्यायी क्रमांक प्रणालीचा प्रस्ताव तयार करून केंद्रीय रस्ते वाहतूक व महामार्ग मंत्रालयाकडे पाठवला आहे.
सध्याच्या मोटार वाहन नियमांनुसार वाहन क्रमांकात दोन अक्षरांऐवजी तीन अक्षरी मालिका (उदा. AAA) सुरू करण्याची तरतूद नाही. त्यामुळे पुणे आरटीओने एक अंक आणि एक इंग्रजी अक्षर अशा नव्या स्वरूपातील मालिका सुरू करण्याचा प्रस्ताव मांडला आहे. उदाहरणार्थ, MH-12 1A, MH-12 1B, MH-12 2A अशा पद्धतीने वाहन नोंदणी क्रमांक देण्याची योजना तयार करण्यात आली आहे. केंद्रीय मंत्रालयाने या प्रस्तावाला मंजुरी दिल्यास देशात प्रथमच वाहन नोंदणी मालिकेत अंक आणि अक्षरांचा संयुक्त वापर केला जाईल आणि त्याची सुरुवात पुण्यातून होईल. यामुळे ‘MH-12’ ही ऐतिहासिक आणि लोकप्रिय ओळख कायम राहण्यास मदत होईल, तसेच नव्या वाहनांच्या नोंदणीसाठी मोठ्या प्रमाणात नवीन क्रमांक उपलब्ध होतील. विशेषतः पुण्यातील दुचाकी आणि चारचाकी वाहनांची वाढती संख्या लक्षात घेता हा प्रस्ताव दीर्घकालीन उपाय मानला जात आहे. सध्या हा प्रस्ताव केंद्रीय रस्ते वाहतूक व महामार्ग मंत्रालयाकडे विचाराधीन असून, मंजुरी मिळाल्यानंतर नव्या मालिकेची अंमलबजावणी केली जाईल. मंजुरीनंतर पुण्यातील नवीन वाहनांच्या नंबरप्लेटवर MH-12 1A XXXX अशा स्वरूपातील क्रमांक पाहायला मिळू शकतात. त्यामुळे ‘MH-12’ ही पुण्याची ओळख कायम ठेवत वाढत्या वाहन नोंदणीच्या समस्येवर तोडगा काढण्याचा मार्ग मोकळा होण्याची शक्यता आहे.
