नवी दिल्ली : महाराष्ट्रातील कथित नीट प्रश्नपत्रिका गळती प्रकरणानंतर देशभरात शिक्षण व्यवस्थेबाबत तीव्र नाराजी व्यक्त होत असून, विविध विद्यार्थी संघटनांकडून केंद्र सरकारविरोधात आंदोलन सुरू आहे. शिक्षण मंत्र्यांच्या राजीनाम्याच्या मागणीसाठी दिल्लीसह अनेक शहरांमध्ये निदर्शने सुरू असून, राजधानीतील आंदोलनाला २४ दिवस पूर्ण झाल्यानंतर त्याची तीव्रता आणखी वाढली आहे. या पार्श्वभूमीवर आता शेतकरी संघटनांनीही भारत-अमेरिका व्यापार कराराविरोधात मोर्चा उघडला असून, दिल्लीतील किसान घाट येथे आयोजित महापंचायतीसाठी पंजाब, हरियाणा आणि इतर राज्यांतील हजारो शेतकरी दाखल होत आहेत. यामुळे राजधानीत तणावपूर्ण वातावरण निर्माण झाले असून संसद परिसरासह संवेदनशील भागांमध्ये मोठ्या प्रमाणात पोलीस बंदोबस्त तैनात करण्यात आला आहे. यावेळी नेहमीप्रमाणे ट्रॅक्टर मोर्चा काढण्याऐवजी शेतकरी बस आणि खासगी वाहनांद्वारे दिल्लीत पोहोचत आहेत. आंदोलनाच्या पार्श्वभूमीवर हरियाणा प्रशासनाने पंजाब-हरियाणा दरम्यानची शंभू सीमा पूर्णपणे सील केली असून, विविध ठिकाणी बॅरिकेड्स उभारून वाहतुकीवर निर्बंध लागू केले आहेत. शेतकरी संघटनांच्या मते, प्रस्तावित भारत-अमेरिका व्यापार करारामुळे देशातील कृषी क्षेत्रावर प्रतिकूल परिणाम होऊ शकतो. या करारामुळे शेतीमालाला योग्य बाजारपेठ मिळण्यात अडचणी निर्माण होतील, तसेच लहान शेतकरी आणि किरकोळ व्यावसायिकांचे आर्थिक नुकसान होण्याची भीती त्यांनी व्यक्त केली आहे. त्यामुळे केंद्र सरकारने हा करार मागे घ्यावा आणि शेतकऱ्यांच्या हिताचे निर्णय घ्यावेत, अशी मागणी आंदोलनकर्त्यांकडून करण्यात येत आहे.
मंगळवारी पहाटेपासून पंजाबमधील फतेहगड साहिबसह विविध भागांतून शेतकऱ्यांचे ताफे दिल्लीकडे रवाना झाले. शांततापूर्ण मार्गाने सरकारपर्यंत आपल्या मागण्या पोहोचवण्याचा प्रयत्न असल्याचे शेतकरी नेत्यांनी स्पष्ट केले असून, मार्गात अडथळे आले तरी आंदोलन मागे घेतले जाणार नाही, असा निर्धारही व्यक्त केला आहे. संभाव्य गर्दी आणि कायदा-सुव्यवस्थेचा प्रश्न लक्षात घेऊन हरियाणा पोलिसांनी सोमवारी रात्रीपासूनच शंभू सीमेवर अतिरिक्त सुरक्षा व्यवस्था उभारली. पंजाब आणि हरियाणाला जोडणाऱ्या घग्गर पुलावरील वाहतूक तात्पुरती बंद करण्यात आली असून, राष्ट्रीय महामार्गांवर अतिरिक्त पोलीस दल तैनात करण्यात आले आहे. प्रशासनाने परिस्थितीवर बारकाईने लक्ष ठेवले असून, कोणताही अनुचित प्रकार घडू नये यासाठी आवश्यक ती सर्व उपाययोजना करण्यात आल्याचे सांगितले आहे. दरम्यान, भारतीय किसान युनियन (बीकेयू)चे नेते गुरनाम सिंग चारुनी आणि राकेश बेन्स यांना पोलिसांनी ताब्यात घेतल्याची माहिती समोर आली आहे. या कारवाईनंतर संतप्त झालेल्या शेतकऱ्यांनी अंबालाजवळील शंभू टोल प्लाझा तसेच हिसार-चंदीगड महामार्गावर आंदोलन करत केंद्र सरकारविरोधात जोरदार घोषणाबाजी केली. राजधानीतील विद्यार्थी आंदोलन आणि शेतकरी आंदोलन एकाच वेळी सुरू असल्याने दिल्लीतील सुरक्षा यंत्रणा सतर्क झाली असून, पुढील काही दिवस परिस्थिती कशी घडामोडी घेते याकडे संपूर्ण देशाचे लक्ष लागले आहे.
