दुबईत फडकला भारताचा तिरंगा! रोल बॉल विश्वचषकावर कोरले भारताने नाव

वृत्तसंस्था : क्रीडा क्षेत्रातील भारताच्या शिरपेचात मानाचा तुरा रोवत, भारतीय पुरुष संघाने ७ व्या रोल बॉल विश्वचषक स्पर्धेचे विजेतेपद पटकावले आहे. दुबई येथे पार पडलेल्या या स्पर्धेत अहिल्यानगर जिल्ह्यातील शेवगावचा सुपुत्र आणि मुंबई प्राप्तिकर विभागातील साहाय्यक हर्षल सोमनाथ घुगे याने आपल्या अष्टपैलू खेळाच्या जोरावर भारताला विश्वविजेतेपद मिळवून दिले. अंतिम सामन्यात हर्षलने केलेल्या तीन महत्त्वपूर्ण गोल्सच्या जोरावर भारताने केनियाचा ११-१० अशा फरकाने निसटता पराभव केला. या स्पर्धेत भारतीय संघ सुरुवातीपासूनच अजिंक्य राहिला. साखळी फेरीत भारताने सौदी अरेबियाचा १६-१ आणि ब्राझीलचा ११-२ असा धुव्वा उडवला. या दोन्ही सामन्यांत हर्षलने आपली छाप सोडली. सौदी अरेबियाविरुद्ध त्याने ४, तर ब्राझीलविरुद्ध ३ गोल नोंदवले. या कामगिरीमुळे भारताने दिमाखात बाद फेरीत प्रवेश केला. बाद फेरीतील चुरशीच्या लढतीत भारताने पारंपरिक प्रतिस्पर्धी पाकिस्तानचा १७-५ असा धुव्वा उडवला. या सामन्यातही हर्षलने २ गोल करत विजयात मोलाचा वाटा उचलला. त्यानंतर उपांत्य फेरीत इजिप्तवर ६-२ अशी मात करत भारताने अंतिम फेरीत धडक मारली. अंतिम सामन्यात भारत आणि केनिया यांच्यात काट्याची टक्कर पाहायला मिळाली. शेवटच्या क्षणापर्यंत रंगलेल्या या सामन्यात हर्षल घुगेने आपल्या अनुभवाचे प्रदर्शन करत ३ महत्त्वाचे गोल केले. हर्षलच्या या कामगिरीमुळे भारताला ११-१० असा विजय मिळवता आला आणि विश्वचषकावर भारताचे नाव कोरले गेले.