खासदारकीच्या लढाईत आमदारांना उतरवणार, लोकसभा निवडणुकीसाठी हुकमी एक्क्यांचे मन वळवणार

मुंबई : आगामी लोकसभा निवडणुका या भारतीय जनता पक्ष आणि त्यांच्या मित्रपक्षांसाठी जशा महत्त्वाच्या आहेत, तशाच त्या भाजप विरोधकांसाठीही तेवढ्याच महत्त्वाच्या आहेत. त्यामुळे कोणत्याही परिस्थितीत या निवडणुका जिंकण्यासाठी दोन्ही बाजूंनी निकराचे प्रयत्न सुरू आहेत. त्याचाच एक भाग म्हणून राज्यात सत्ताधारी तसेच विरोधक अशा दोघांकडूनही विधानसभेवर सातत्याने निवडून येणाऱ्या आमदारांना हुकमी एक्के म्हणून खासदारकीच्या अर्थात लोकसभा निवडणुकीच्या रिंगणात उतरविण्याची तयारी सुरू असल्याचे खात्रीलायकरित्या समजते.
भाजपच्या विरोधात देशभरातील विरोधी पक्ष एकत्रित येत असून येणाऱ्या २०२४च्या लोकसभा निवडणुकीत कोणत्याही परिस्थितीत भाजपला शह देण्याची खूणगाठ विरोधकांनी बांधली आहे. महाराष्ट्रातही काँग्रेस, राष्ट्रवादी काँग्रेस आणि शिवसेना यांच्या महाविकास आघाडीने भाजप आणि मुख्यमंत्री एकनाथ शिंदे यांच्या शिवसेनेच्या विरोधात रणशिंग फुंकले आहे. लोकसभा निवडणुकीमध्ये विजय मिळवल्यास विधानसभा निवडणुकीतील विजयाचा मार्ग आपोआप सुकर होईल, असे सत्ताधाऱ्यांना आणि विरोधकांनाही वाटत आहे. त्यामुळे त्यांनी लोकसभा निवडणुकीची रणनीती आखायला सुरुवात केली आहे. लोकसभा निवडणुकीमध्ये आपला उमेदवार निवडून आणावयाचा असल्यास उमेदवार देखील तेवढाच तगडा असायला हवा, यासाठी सर्वच पक्ष जिथे निवडणूक अटीतटीची होईल अशा ठिकाणी विधानसभेवर सातत्याने निवडून येणारे हुकमी एक्के असलेल्या आमदारांना उमेदवारी देण्याची तयारी करीत आहेत. भाजपकडून कोकणात सार्वजनिक बांधकाम मंत्री रविंद्र चव्हाण, तसेच जळगावमध्ये, वैद्यकीय शिक्षण मंत्री गिरीश महाजन यांची नावे आघाडीवर आहेत. उद्धव ठाकरे यांच्या शिवसेनेकडून मुंबईतील लोकसभा मतदारसंघासाठी आमदार सुनील प्रभू तसेच माजी आमदार विशाखा राऊत यांच्या नावाची चाचपणी सुरू असल्याचे खात्रीलायकरित्या समजते. राष्ट्रवादीकडून रायगडमध्ये माजी मंत्री आदिती तटकरे यांचे नाव चर्चेत असल्याचे कळते. काँग्रेसनेही काही माजी मंत्र्यांची यादी तयार केली असून संबंधीत आमदारांकडे विचारणा सुरू असल्याचे समजते. बऱ्याचदा आमदार हे खासदारकीच्या निवडणुकांसाठी तयार होत नाहीत. मात्र यावेळची परिस्थिती आर या पारची असल्याने राजकीय पक्षांनी आमदारांचे मन वळवण्याचे प्रयत्न सुरू आहेत. अथवा त्यांच्यावर एकप्रकारे दबाव आणण्यास प्रारंभ झाला आहे.
मुख्यमंत्री एकनाथ शिंदे यांच्या शिवसेनेचे सध्या १३ खासदार आहेत. यातील काही जागांना उद्धव ठाकरे यांच्या पक्षाकडून धोका असल्याचे स्पष्ट दिसत असल्याने या ठिकाणी त्यांच्या पक्षातील ४० आमदारांपैकी काही जणांना लोकसभा निवडणुकीत उतरविण्याबाबत चर्चा झाली आहे. शालेय शिक्षणमंत्री दीपक केसरकर यांच्यासह काही जणांची त्यासाठी चाचपणी सुरू आहे.