नवी दिल्ली : आंतरराष्ट्रीय क्रिकेट परिषदेने (आयसीसी) महिला क्रिकेटसाठी एक ऐतिहासिक निर्णय घेतला आहे. जागतिक स्तरावर या निर्णयाचे खूप कौतुकही केले जात आहे. अनेक वर्षांपासून मागणी होत असलेला हा निर्णय आता आयसीसीने घेतला आहे. याची सुरुवात आगामी टी-२० विश्वचषकापासून होऊ शकते. महिला क्रिकेटसाठी आयसीसीचा हा ऐतिहासिक निर्णय असल्याचे सांगण्यात येत आहे. बीसीसीआयचे अध्यक्ष जय शाह यांनीही ट्विट करून आयसीसीच्या या निर्णयावर आनंद व्यक्त केला आहे. आयसीसी स्पर्धांमध्ये आता पुरुष आणि महिला दोन्ही संघांसाठी समान बक्षिसाची रक्कम समान असेल. असे आयसीसीने जाहीर केले आहे. आयसीसी टूर्नामेंटमध्ये समान बक्षीस रकमेबद्दल बराच काळ चर्चा होत होती. अशा परिस्थितीत दक्षिण आफ्रिकेतील डर्बन येथे झालेल्या आयसीसीच्या वार्षिक परिषदेत यावर शिक्कामोर्तब झाले. आयसीसीचे अध्यक्ष ग्रेग बार्कले यांनी एका निवेदनात म्हटले आहे की, आमच्या खेळाच्या इतिहासातील हा एक महत्त्वाचा क्षण आहे आणि मला आनंद होत आहे की आयसीसी स्पर्धांमध्ये भाग घेणार्या पुरुष आणि महिला क्रिकेटपटूंना आता समान प्रमाणात बक्षीस मिळेल.
बार्कले म्हणाले, ‘२०१७ पासून आम्ही महिला क्रिकेट मजबूत करण्याच्या दिशेने काम करत होतो. आम्ही महिलांच्या स्पर्धांमध्ये समान बक्षीस रकमेसाठी दरवर्षी रक्कम वाढवली आणि यापुढे, आयसीसी महिला क्रिकेट विश्वचषक जिंकल्यास आयसीसी पुरुष क्रिकेट विश्वचषक जिंकल्याप्रमाणेच बक्षीस रक्कम मिळेल आणि तीच रक्कम टी-२० विश्वचषक आणि १९ वर्षांखालील साठी लागू होईल. या निर्णयापूर्वी आयसीसी स्पर्धांमध्ये महिला आणि पुरुषांना मिळणाऱ्या बक्षीस रकमेत मोठी तफावत होती. जर आपण ५० षटकांच्या विश्वचषकाबद्दल बोललो तर २०१९ मध्ये इंग्लंडला चॅम्पियन बनण्यासाठी २८.४ कोटींची बक्षीस रक्कम मिळाली होती. त्याच वेळी, न्यूझीलंडचा संघ उपविजेता होता, ज्यामुळे त्याला १४.२ कोटी मिळाले. दुसरीकडे, महिलांच्या एकदिवसीय विश्वचषकाचा विचार केला तर २०२२ मध्ये चॅम्पियन बनलेल्या संघाला फक्त ९.९८ कोटी मिळाले तर उपविजेत्या संघाला ४.५३ कोटी मिळाले. अशा परिस्थितीत आयसीसीने घेतलेला निर्णय महिला क्रिकेटसाठी ऐतिहासिक आहे.केवळ एकदिवसीय विश्वचषकातच नाही तर टी-२० मधील महिला आणि पुरुष संघांच्या बक्षीस रकमेतही मोठी तफावत होती. या वर्षाच्या सुरुवातीला टी-२० विश्वचषक स्पर्धेत चॅम्पियन झालेल्या ऑस्ट्रेलियाला बक्षीस म्हणून ८.२७ कोटी रुपये मिळाले होते. आणि उपविजेत्या दक्षिण आफ्रिकेला केवळ ४.१३ कोटी मिळाले, तर उपांत्य फेरीत पोहोचलेल्या संघांना १.७३ कोटी रुपये मिळाले. अशाप्रकारे, संपूर्ण स्पर्धेसाठी आयसीसीने २०.२८ कोटींची रक्कम निश्चित केली होती.
दुसरीकडे, जर आपण पुरुषांच्या टी-२० विश्वचषकाबद्दल बोललो, तर २०२२ मध्ये इंग्लंड संघ चॅम्पियन बनला आणि १३ कोटी इतकी मोठी रक्कम मिळाली. याशिवाय उपविजेत्याला ६.५ कोटी मिळाले. त्याच वेळी, उपांत्य फेरीत पोहोचलेल्या संघांना ३.२५ कोटी देण्यात आले. अशा प्रकारे, आयसीसीने संपूर्ण स्पर्धेसाठी ४५.४ कोटींची रक्कम निश्चित केली होती.
