रत्नागिरी : गणपतीपुळे येथे शनिवारी सकाळी घडलेल्या दुर्दैवी दुर्घटनेने परिसरात हळहळ व्यक्त केली जात आहे. छत्रपती संभाजीनगर येथून पर्यटनासाठी आलेल्या आठ जणांचा समुद्रात बुडाल्याचा प्रकार समोर आला आहे. सकाळी सुमारे दहा वाजण्याच्या सुमारास ही घटना घडली. प्राथमिक माहितीनुसार, पर्यटकांचा एक गट समुद्रात उतरला होता. मात्र भरतीची स्थिती आणि समुद्रातील पाण्याचा वेग यांचा अचूक अंदाज न आल्याने हे सर्वजण खोल पाण्याकडे वाहून जाऊ लागले. समुद्रात पर्यटक अडचणीत आल्याचे लक्षात येताच स्थानिक जीवरक्षक आणि नागरिकांनी तातडीने बचावकार्य सुरू केले. या प्रयत्नांमध्ये तीन पर्यटकांना सुखरूप बाहेर काढण्यात यश आले असून त्यांची प्रकृती स्थिर असल्याचे सांगितले जात आहे. मात्र उर्वरित पाच जण बेपत्ता असल्याने चिंतेचे वातावरण निर्माण झाले आहे. या घटनेची माहिती मिळताच पोलीस आणि स्थानिक प्रशासन घटनास्थळी दाखल झाले असून परिस्थितीवर बारकाईने लक्ष ठेवले जात आहे.
बेपत्ता पर्यटकांचा शोध घेण्यासाठी स्थानिक प्रशासन, जीवरक्षक आणि मच्छीमार यांच्या मदतीने व्यापक शोधमोहीम राबविण्यात येत आहे. समुद्रातील परिस्थितीचा अंदाज घेत विविध पथके शोधकार्य करत असून बेपत्ता व्यक्तींचा माग काढण्यासाठी सर्वतोपरी प्रयत्न सुरू आहेत. अद्याप बेपत्ता असलेल्या पर्यटकांबाबत कोणतीही अधिकृत माहिती हाती आलेली नसली तरी शोधकार्य वेगाने सुरू असल्याचे प्रशासनाकडून सांगण्यात आले आहे. या दुर्घटनेमुळे गणपतीपुळे परिसरात तसेच पर्यटकांमध्ये मोठी खळबळ उडाली आहे. समुद्रकिनाऱ्यावर भेट देणाऱ्या पर्यटकांनी सुरक्षा सूचनांचे पालन करावे, जीवरक्षकांच्या इशाऱ्यांकडे दुर्लक्ष करू नये आणि भरतीच्या काळात समुद्रात उतरताना विशेष खबरदारी घ्यावी, असे आवाहन प्रशासनाकडून करण्यात येत आहे. दरम्यान, बेपत्ता पर्यटकांच्या कुटुंबीयांमध्ये चिंतेचे वातावरण असून संपूर्ण परिसराचे लक्ष सुरू असलेल्या शोधमोहीमेकडे लागले आहे.
