ठाणेकरांचा प्रवास सुखकर होणार; वर्षभरात १८६ विद्युत बसगाड्या टिएमटीच्या ताफ्यात

ठाणे : ठाणे परिवहन उपक्रमाच्या ताफ्यात १२३ विद्युत वातानुकूलीत बसगाड्या दाखल झाल्याने ठाणेकरांचा प्रवास गारेगार होत असतानाच, त्यापाठोपाठ आता १५ व्या वित्त आयोगातून १८० विद्युत वातानुकूलीत बसगाड्या परिवहन उपक्रमाला मिळणार आहेत. त्यापैकी ८६ बसगाड्यांबरोबरच केंद्र शासनाच्या पीएम ई बस सेवा योजनेंतर्गत १०० अशा एकूण १८६ विद्युत वातानुकूलीत बसगाड्या वर्षभरात परिवहनच्या ताफ्यात दाखल होणार असल्याची माहिती सुत्रांनी दिली. या बसगाड्यांमुळे ठाणेकरांचा प्रवास अधिक सुखकर होण्याची चिन्हे आहेत. ठाणे महापालिका परिवहन उपक्रम हा ना नफा ना तोटा या तत्वावर चालविण्यात येतो. या उपक्रमाच्या ताफ्यात एकूण ४०० बसगाड्या आहेत. पैकी ३६० बसगाड्या प्रवासी सुविधेसाठी उपलब्ध होत आहेत. ठाणे शहराची लोकसंख्या २५ लाखांच्या घरात गेली आहे. प्रवाशी संख्येच्या तुलनेत या बसगाड्यांची संख्या अपुरी पडत आहे. यामुळे परिवहनच्या ताफ्यातील बसगाड्यांची संख्या वाढविण्यावर प्रशासनाकडून भर देण्यात येत आहे. त्याचबरोबर शहरातील पर्यावरणाचा समतोल राखला जावा यासाठी पर्यावरणपुरक विद्युत बसगाड्यांची खरेदी केली जात आहे. त्याचाच एक भाग म्हणून केंद्र आणि राज्य शासनाच्या १५ व्या वित्त आयोगातून पालिकेला एकूण ३०३ विद्युत बसगाड्या उपलब्ध होणार असून त्यापैकी १२३ बसगाड्या परिवहनच्या ताफ्यात दाखल झालेल्या आहेत. उर्वरीत १८० बसगाड्या पुढील तीन वर्षात परिवहन उपक्रमाला मिळणार असून त्यापैकी ८६ बसगाड्या पुढील वर्षी तर, ९४ बसगाड्या दोन वर्षानी मिळणार आहेत. या बसगाड्या जीसीसी तत्वावर चालविण्यात येणार असून त्यासाठी पालिकेने १८० बसगाड्यांच्या संचलनासाठी निविदा काढून ठेकेदार निश्चित करण्याची प्रक्रिया सुरू केली आहे.