गुंतवणूकदारांची ७३ लाखाची डोंबिवलीतील सर्थक वेल्थ मॅनेजमेंट कंपनीकडून फसवणूक

पोलिसांनी सांगितले, रंजीत बयास यांची सर्थक वेल्थ मॅनेजमेंट ही गुंतवणूकदार कंपनी आहे. या कंपनीत गुंतवणूक केल्यास कमी कालावधीत झटपट परतावा मिळेल असे आमिष आरोपी रंजीत बयास गुंतवणूकदारांना दाखवत होता. या आमिषाला बळी पडून घाटकोपर येथील व्यावसायिक तक्रारदार दीपक सावला यांनी ५० लाख रूपयांची गुंतवणूक सर्थक वेल्थ कंपनीत केली. दोघांनी मिळून सामंजस्य करार केला. या कराराप्रमाणे आरोपी रंजीत बयास याने सावला यांना ठराविक टप्प्यात गुंतवणूक रकमेवर व्याज देण्याचे लेखी आश्वासन दिले होते. कराराप्रमाणे रंजीत याने सावला यांना एक वर्ष उलटून गेले तरी व्याज रक्कम दिली नाही. विविध कारणे देऊन तो व्याज देण्यास टाळाटाळ करत होता. अशापध्दतीने आरोपीने इतर पाच जणांकडून २३ लाख रूपये गुंतवणुकीसाठी घेतले होते. त्यांना आरोपी व्याज देत नव्हता. सतत मागणी करूनही आरोपी व्याज देत नाही. मूळ रक्कम परत देण्याची मागणी करूनही तो मूळ रक्कमही परत देत नव्हता. त्याने आपली गुंतवणूक रक्कम स्वताच्या स्वार्थासाठी वापरून आपल्या गुंतवणूक रकमेचा अपहार केला म्हणून सावला यांच्यासह पाच जणांनी रामनगर पोलीस ठाण्यात तक्रार केली. पोलीस उपनिरीक्षक नलावडे तपास करत आहेत.