मुंबई : Mumbai Indians चा आयपीएल २०२६ हंगामातील खराब फॉर्म पाहता संघात मोठ्या बदलाची चर्चा रंगली आहे. माजी भारतीय क्रिकेटपटू मनोज तिवारी यांनी सध्याचा कर्णधार हार्दिक पांड्या याच्याकडून कर्णधारपद काढून ते पुन्हा रोहित शर्मा याच्याकडे सोपवण्याची मागणी केली आहे.
मुंबई इंडियन्सची सुरुवात अत्यंत निराशाजनक ठरली असून, पहिल्या पाच सामन्यांपैकी चार सामन्यांत पराभव स्वीकारावा लागला आहे. नुकत्याच Punjab Kings विरुद्धच्या सामन्यातही संघाला ७ गड्यांनी हार पत्करावी लागली, ज्यामुळे संघाच्या कामगिरीवर अधिकच टीका होत आहे. मनोज तिवारी यांच्या मते, हार्दिक पांड्याचे नेतृत्व ‘सरासरी’ दर्जाचे वाटत असून दबावाखाली घेतलेले निर्णय संघासाठी घातक ठरत आहेत. सामन्यानंतर दिलेल्या काही विधानांमुळे संघातील वातावरण बिघडल्याचे संकेतही त्यांनी दिले. दुसरीकडे, रोहित शर्मा याचा अनुभव मुंबईसाठी मोठा प्लस पॉइंट मानला जात आहे. त्याच्या नेतृत्वाखाली संघाने पाच वेळा आयपीएल विजेतेपद पटकावले आहे. त्यामुळे सध्याच्या परिस्थितीत त्याला पुन्हा कर्णधारपद देणे हाच योग्य पर्याय असल्याचे मत तिवारी यांनी व्यक्त केले. दरम्यान, Wankhede Stadium येथे प्रेक्षकांकडून हार्दिक पांड्याला सातत्याने हूटिंगचा सामना करावा लागत आहे, ज्यामुळे त्याच्यावर मानसिक दबाव वाढत असल्याचे दिसून येत आहे. सध्या मुंबई इंडियन्स गुणतालिकेत नवव्या स्थानावर असून, प्लेऑफच्या शर्यतीत टिकून राहण्यासाठी संघ व्यवस्थापन मोठा निर्णय घेणार का, याकडे सर्व क्रिकेटप्रेमींचे लक्ष लागले आहे.
