मुंबई : राज्यातील नागरिकांमध्ये कर्करोग, मधुमेह, हृदयविकार, रक्ताची कमतरता तसेच हाडांच्या झिजेसारख्या असंसर्गजन्य आजारांचे प्रमाण वाढत असल्याच्या पार्श्वभूमीवर राज्य सरकारने विशेष आरोग्य मोहीम राबवण्याचा निर्णय घेतला आहे. दिवंगत उपमुख्यमंत्री अजित पवार यांच्या जयंतीनिमित्त १५ जुलै ते २२ जुलै या कालावधीत राज्यभर आरोग्य तपासणी आणि विशेष आरोग्य शिबिरांचे आयोजन करण्यात येणार असल्याची माहिती वैद्यकीय शिक्षण मंत्री हसन मुश्रीफ यांनी दिली. राज्यात रक्ताचा तुटवडा जाणवत असल्याने या मोहिमेत रक्तदान शिबिरांवर विशेष भर देण्याच्या सूचनाही त्यांनी दिल्या. मंत्रालयात आयोजित बैठकीत या उपक्रमाचा आढावा घेण्यात आला. यावेळी वैद्यकीय शिक्षण विभागाचे वरिष्ठ अधिकारी तसेच विविध शासकीय वैद्यकीय महाविद्यालयांचे अधिष्ठाता उपस्थित होते. मंत्री मुश्रीफ यांनी सांगितले की, शासकीय वैद्यकीय महाविद्यालयांमध्ये उपलब्ध असलेले तज्ज्ञ डॉक्टर, आधुनिक वैद्यकीय सुविधा आणि उपचार क्षमता ग्रामीण व दुर्बल घटकांपर्यंत पोहोचवणे आवश्यक आहे. यासाठी राज्यातील सर्व शासकीय वैद्यकीय महाविद्यालयांच्या माध्यमातून रक्तदान शिबिरे, मुख कर्करोग, स्तन कर्करोग आणि गर्भाशय मुख कर्करोग तपासणी, हाडांची घनता तपासणी तसेच विविध आरोग्य शिबिरांचे आयोजन करण्यात येणार आहे.
शिबिरांमध्ये नागरिकांची तपासणी करून आवश्यक उपचार उपलब्ध करून दिले जाणार आहेत. गरजेनुसार पुणे, नागपूर, छत्रपती संभाजीनगर आणि कोल्हापूर येथील शासकीय वैद्यकीय महाविद्यालयांमध्ये शस्त्रक्रियेची सुविधाही उपलब्ध करून देण्यात येणार आहे. अवयव प्रत्यारोपण आणि महत्त्वाच्या शस्त्रक्रियांसाठी सामाजिक उत्तरदायित्व निधीच्या माध्यमातून मदत मिळवण्याच्या सूचनाही यावेळी देण्यात आल्या. या उपक्रमाच्या यशस्वी अंमलबजावणीसाठी प्रत्येक शासकीय वैद्यकीय महाविद्यालयात अधिष्ठातांच्या अध्यक्षतेखाली विशेष समिती स्थापन करण्यात येणार आहे. या समितीत प्राध्यापक, निवासी डॉक्टर, वैद्यकीय प्रशिक्षणार्थी, परिचारिका, प्रयोगशाळा तंत्रज्ञ, प्रशासकीय कर्मचारी आणि राष्ट्रीय सेवा योजना स्वयंसेवकांचा समावेश असेल. आरोग्य शिबिरांचे नियोजन, समन्वय, अंमलबजावणी आणि अहवाल तयार करण्याची जबाबदारी या समितीकडे सोपवण्यात येणार आहे. राज्यभर व्यापक जनजागृती मोहीम राबवण्याचे निर्देशही मंत्री मुश्रीफ यांनी दिले आहेत. स्थूलता, हर्निया, व्हेरिकोज शिरा, थॅलेसेमिया, मधुमेह, हृदयविकार, वेदना व्यवस्थापन, मानव दूध बँक, स्तनपान, कृत्रिम अवयव आणि इतर असंसर्गजन्य आजारांविषयी नागरिकांमध्ये जागरूकता निर्माण करण्यावर भर दिला जाणार आहे. तसेच शिबिरस्थळी स्वच्छता राखणे, वृक्षारोपण उपक्रम राबवणे आणि स्थानिक आरोग्य विभागाच्या सहकार्याने अधिकाधिक नागरिकांपर्यंत सेवा पोहोचवण्याचे निर्देश देण्यात आले आहेत. या विशेष मोहिमेमुळे ग्रामीण व दुर्बल घटकांतील नागरिकांना वेळेत आरोग्य तपासणी आणि उपचार मिळण्यास मदत होणार असून प्रतिबंधात्मक आरोग्यसेवेबाबत जनजागृती वाढण्यासही हातभार लागणार आहे.
शिबिरात काय असणार :
- रक्तदान शिबिरात स्वेच्छा रक्तदानास प्रोत्साहन देणे, राज्यातील रक्तसाठा वाढविणे हे उद्दिष्ट
- स्तन कर्करोग तपासणी शिबिर- स्तन कर्करोगाबाबत क्लिनिकल तपासणी आणि आवश्यकतेनुसार उपचार.
- गर्भाशय मुख कर्करोग तपासणी करून जनजागृती व समुपदेशन करण्यात येणार.
- हाडांची घनता तपासणी (बोन मिनरल डेन्सिटी) शिबिरात गुडघा व खुब्याचा सांधा तपासणी होणार. अस्थिरोग तज्ज्ञांकडून मार्गदर्शन आणि आवश्यकतेनुसार उपचार करण्यात येणार.
- मुख कर्करोग- तंबाखूमुक्ती जनजागृती, मुख तपासणी व पूर्वकर्करोग अवस्थांचे लवकर निदान यावर भर देण्यात येणार आहे. यासाठी नागपूर, कोल्हापूर, छत्रपती संभाजीनगर आणि पुण्यातील शासकीय रूग्णालयात उपचार करण्यात येणार.
- शासकीय वैद्यकीय महाविद्यालय कोल्हापूर आणि बारामती येथे डॉ. मुफ्फजल लकडावाला यांच्या मार्गदर्शनाखाली दुर्बिणीद्वारे (लॅप्रोस्कोपिक) हर्निया शस्त्रक्रिया व स्थूलता (ओबेसिटी) तपासणी शिबिर होणार.
- अशुद्ध रक्तवाहिन्यांची सूज (व्हेरिकोज व्हेन्स) डॉप्लर तपासणी व उपचार शिबिर कोल्हापूर आणि बारामतीमध्ये होणार.
