पालघर : मोकाट आणि भटक्या श्वानांचा वाढता उपद्रव आणि त्यामुळे नागरिकांना होणाऱ्या त्रासाची सर्वोच्च न्यायालयाने गंभीर दखल घेत सार्वजनिक ठिकाणावरून भटक्या श्वानांचा बंदोबस्त तसेच आवश्यक उपाययोजना करण्याचे निर्देश सर्व राज्य सरकार आणि स्थानिक स्वराज्य संस्थांना दिले आहेत. त्यानुसार पालघर जिल्ह्यातील नागरी आणि ग्रामीण भागातील मोकाट आणि भटक्या श्वानांच्या उपद्रवावर नियंत्रण मिळवण्याचे प्रयत्न जिल्हा परिषद पशुसंवर्धन विभाग आणि प्राणी संघटना व स्थानिक ग्रामपंचायत प्रशासन यांच्या माध्यमातून सुरू करण्यात आले आहेत.
पालघर तालुक्यातील बोईसर, मनोर आणि वेढी या तीन ग्रामपंचायत हद्दीत भटक्या श्वानांसाठी निवारा केंद्रे तयार करण्यात येत असून या ठिकाणी पशुवैद्यकीय अधिकाऱ्यांचे मार्गदर्शन आणि देखरेखीखाली प्राणी संघटना यांच्यामार्फत भटक्या श्वानांचे निर्बीजीकरण आणि लसीकरण पार पडणार आहे. बुधवारी बोईसर आणि मनोर येथे श्वान निर्बीजीकरण शस्त्रक्रिया व अँटी-रेबीज लसीकरणासाठी विलगीकरण केंद्राचे उद्घाटन करण्यात आले. हा उपक्रम पशुसंवर्धन विभाग बोईसर व मनोर ग्रामपंचायत आणि युनिव्हर्सल ऍनिमल वेल्फेअर सोसायटी, जेनाइस आणि नव समाज निर्माण या प्राणी संस्थांच्या मार्फत राबविण्यात येणार आहे. पुढील काही दिवसात सफाळे जवळील वेढी येथील निवारा केंद्राचे उद्घाटन होणार आहे. बोईसर आणि मनोर येथील श्वान निवारा केंद्राचे उद्घाटन जिल्हा परिषदेचे कार्यकारी अधिकारी मनोज रानडे यांच्या हस्ते करण्यात आले.
