पुणे (सोमनाथ रायकर) : पुरंदर तालुक्यातील काळेवाडी येथे एसटी बसच्या धडकेत एका ज्येष्ठ नागरिकांचा दुर्दैवी मृत्यू झाल्याची घटना घडली आहे. या अपघातात ८५ वर्षीय नामदेव मारुती कुंजीर (रा. आंबळे रेल्वे स्टेशन, ता. पुरंदर) यांचा मृत्यू झाला. गुरुवारी (दि. ३०) ते काळे लॉन्स येथे नातेवाईकांच्या लग्न समारंभासाठी आले होते. समारंभ आटोपल्यानंतर घरी जाण्यासाठी ते रस्ता ओलांडत असताना सासवडकडून येणाऱ्या एसटी बसने त्यांना जोरदार धडक दिली. या अपघातात त्यांच्या डोक्याला गंभीर दुखापत झाली आणि ते घटनास्थळी बेशुद्ध पडले.
स्थानिकांच्या मदतीने त्यांना तातडीने सासवड येथील ग्रामीण रुग्णालयात उपचारासाठी दाखल करण्यात आले. मात्र तपासणीनंतर डॉक्टरांनी त्यांना मृत घोषित केले. या प्रकरणी मृतांचे पुत्र संतोष कुंजीर यांनी सासवड पोलिस ठाण्यात संबंधित बस चालकाविरोधात फिर्याद दाखल केली आहे. अपघातग्रस्त बसचा क्रमांक एमएच १४ एमएच २६४६ असा असून, पुढील तपास कुमार कदम यांच्या मार्गदर्शनाखाली पोलिस हवालदार शिंदे करत आहेत.
