मुंबई : संजय गांधी राष्ट्रीय उद्यान प्रशासनाने विविध पर्यटन सेवांच्या शुल्कात वाढ करण्याचा निर्णय घेतला असून सुधारित दर १ मे २०२६ पासून लागू करण्यात आले आहेत. वाढता व्यवस्थापन खर्च आणि ऑनलाइन तिकीट प्रणाली सुरू करण्याच्या उद्देशाने शुल्काचे पुनर्नियोजन करण्यात आल्याचे उद्यान प्रशासनाने स्पष्ट केले आहे. वन्यजीव संरक्षण अधिनियम १९७२ आणि महाराष्ट्र वन्यजीव संरक्षण नियम २०१४ अंतर्गत मिळालेल्या अधिकारांचा वापर करून ही दरवाढ लागू करण्यात आली आहे. नवीन निर्णयानुसार, मुख्य प्रवेशद्वारातून प्रवेशासाठी भारतीय प्रौढांना १५० रुपये, तर मुलांना ७५ रुपये शुल्क आकारले जाणार आहे. परदेशी पर्यटकांसाठी हे शुल्क अनुक्रमे ४५० रुपये आणि २२५ रुपये निश्चित करण्यात आले आहे.
सध्या पर्यटकांना तिकीट खिडकीवर रांगेत उभे राहून तिकीट घ्यावे लागते. ही गैरसोय दूर करण्यासाठी आणि प्रशासनात अधिक पारदर्शकता आणण्यासाठी उद्यान प्रशासनाने ‘एकीकृत ऑनलाइन तिकीट व्यवस्थापन प्रणाली’ सुरू करण्याचा निर्णय घेतला आहे. या प्रणालीमुळे पर्यटकांचा वेळ वाचण्यासोबतच कर्मचाऱ्यांवरील ताणही कमी होईल, असा दावा प्रशासनाने केला आहे. दरम्यान, सकाळी फिरण्यासाठी उद्यानात येणाऱ्या ज्येष्ठ नागरिक आणि सामान्य नागरिकांसाठी प्रस्तावित करण्यात आलेल्या मोठ्या शुल्कवाढीमुळे नाराजीचे वातावरण निर्माण झाले आहे. मिळालेल्या माहितीनुसार, ज्येष्ठ नागरिकांसाठी शुल्क ४५ रुपयांवरून ५ हजार रुपये आणि इतर नागरिकांसाठी ३८३ रुपयांवरून १० हजार रुपये करण्याचा प्रस्ताव चर्चेत आला होता. या प्रस्तावित वाढीवर माजी खासदार गोपाळ शेट्टी यांनी वन विभाग आणि वनमंत्र्यांकडे पत्राद्वारे आक्षेप नोंदवत परिपत्रकाला तात्काळ स्थगिती देण्याची मागणी केली आहे. संजय गांधी राष्ट्रीय उद्यान येथे भेट देणाऱ्या पर्यटकांसाठी आता ऑनलाइन तिकीट बुकिंगची सुविधा उपलब्ध करण्यात आली आहे. ‘एकीकृत ऑनलाइन तिकीट व्यवस्थापन प्रणाली’द्वारे पर्यटकांना प्रवेश तिकीट, वाघ-सिंह सफारी तसेच इतर उपक्रमांचे आरक्षण घरबसल्या करता येणार आहे. मुख्य प्रवेश तिकीट आणि सफारी बुकिंगसाठी ‘safaribooking.mahaforest.gov.in’ या अधिकृत संकेतस्थळाचा वापर करता येणार असून, निवास सुविधेसाठी ‘sgnpaccommodation.mahaonline.gov.in’ हे स्वतंत्र पोर्टल उपलब्ध करण्यात आले आहे. ऑनलाइन बुकिंगसाठी नवीन वापरकर्त्यांना प्रथम नोंदणी करावी लागणार आहे. त्यानंतर लॉगिन करून ‘Entry & Activity Booking’ या विभागातून प्रवेश तिकीट, सफारी किंवा इतर उपक्रम निवडता येतील. पर्यटकांची संख्या आणि भेटीची तारीख निश्चित केल्यानंतर ऑनलाइन पेमेंट करून तिकीट डाउनलोड किंवा प्रिंट घेता येणार आहे. अधिकृत माहितीनुसार, ही वेबसाइट सध्या लॅपटॉप किंवा कॉम्प्युटरवर अधिक सुरळीतपणे कार्यरत आहे. उद्यान सकाळी ७:३० ते सायंकाळी ६:३० या वेळेत खुले असते, मात्र सोमवारी बंद राहते. ऑनलाइन बुक केलेले तिकीट प्रवेशद्वारावर दाखवणे किंवा पडताळणीसाठी सादर करणे आवश्यक असू शकते, असे प्रशासनाने स्पष्ट केले आहे.
इतर महत्त्वाच्या सेवांचे दर खालीलप्रमाणे आहेत:
- कान्हेरी ई-बस सेवा : प्रौढ १०० रुपये, मुले ५० रुपये
- वाघ आणि सिंह सफारी : प्रौढ २५० रुपये, मुले १२५ रुपये
- वनराणी (मिनी ट्रेन) : प्रौढ १०० रुपये, मुले ५० रुपये
- बोटिंग : २ सीटर २०० रुपये, ४ सीटर ४०० रुपये
- सायकल (प्रति तास) : ३०० रुपये (अनामत रक्कम ५०० रुपये)
